Маҳаллий ва россиялик ишбилармонлар, мутахассислар иштирок этган ушбу тадбирдан кўзланган мақсад икки мамлакат ўртасидаги лойиҳалар ва кластерлар фаолияти бўйича минтақавий ҳамкорликни мустаҳкамлашга қаратилди. 

 

Ўзбекистон Республикаси Иқтисодиёт вазири Ботир Хўжаев, Россия кластер ва технопарклари ассоциацияси директори Андрей Шпиленко ва бошқалар сўзга чиқиб, Ўзбекистон ва Россия давлатлари ўртасида минтақалараро муносабатларни ривожлантиришда бошланган янгича ёндашув ва усуллари икки томон учун муҳим қадам бўлганини таъкидлади. 

 

Сессияда "Ўзбекистон саноатида кластер услубини қўллаш тажрибаси ва истиқболлари", “Саноат кластерлари корхоналарининг рақобатбардошлиги учун самарали восита (Олтой ўлкаси мисолида)”, "Ўзаро инвестиция лойиҳаларини амалга ошириш ва савдо-иқтисодий ҳамкорликни чуқурлаштириш орқали эркин иқтисодий зоналарнинг салоҳиятини ривожлантириш истиқболлари”, "Россия махсус иқтисодий зоналарининг салоҳиятидан фойдаланиш”, “Ўзбекистон Республикаси билан Россия Федерацияси ўртасидаги минтақалараро муносабатларни ривожлантиришнинг янги ёндашувлари ва усуллари” каби мавзуларда маърузалар тингланди. 

 

Якунда Ўзбекистон Республикаси Иқтисодиёт вазирлиги ва Россия кластер ва технопарклари уюшмаси ўртасида ҳамкорлик тўғрисидаги битим имзоланди. 

 

Битимга кўра, икки томон ўртасида саноат ва илмий-техникавий соҳаларга инвестицияларни жалб қилиш учун қулай шароитлар яратиш мақсадида мамлакатларда саноат технопарклар ва кластерларни ривожлантириш ҳамда илмий-техникавий ва саноат кооперацияси соҳасида минтақалараро ва халқаро алоқаларни мустаҳкамлашга эътибор қаратилади. 

 

Форум доирасидаги сессия, учрашув ва давра суҳбатлари давом этмоқда.