2018 йилнинг 12 июль куни Ўзбекистон ҳукумати делегациясининг София шаҳрига ташрифи доирасида Ўзбекистон-Болгария савдо уйининг очилиш маросими бўлиб ўтди.

Тадбирда савдо уйи таъсисчилари сифатида ўзбек томонидан “Uztrade”​ ташқи савдо компанияси ҳамда Болгария томонидан “MBI Engineering Ltd”​ компанияси қатнашишди.

Очилиш маросимида Ўзбекистон Республикаси Бош вазирининг ўринбосари Н.Отажонов, бошқа делегация аъзолари, шунингдек, Болгария ишбилармон доиралари вакиллари сўзга чиқдилар.

Тадбир давомида Болгария компанияларининг кўплаб вакиллари Ўзбекистонда ишлаб чиқарилаётган маҳсулотлар билан танишиш имкониятига эга бўлди.

Тадбир иштирокчилари учун Республиканинг савдо-инвестицион салоҳияти тақдимоти бўлиб ўтди. Учрашувлар натижасида ўзбек маҳсулотларини Болгария бозорига етказиб бериш бўйича ўзаро савдо шартномалари имзоланди.

Мазкур савдо уйи экспорт ҳажмини ошириш, Болгария бозоридаги Ўзбекистон позициясини мустаҳкамлаш ва икки томонлама муносабатларни изчил ва кўп қиррали ривожлантириш мақсадида ташкил этилди.

“Uztrade” акциядорлик компаниясининг раҳбарияти мазкур савдо уйи ўзбек маҳсулотларини Болгария бозори учун доимий равишда тарғибот қилиб боришини алоҳида таъкидлаб ўтди.

Манба: Ўзбекистон Республикаси инвестициялар, саноат ва савдо вазирлиги