Маълумки, 2018 йил 9-10 март кунлари Ўзбекистон Республикаси Президенти Ш.Мирзиёев  Тожикистон Республикасининг Душанбе шаҳрига қилган ташрифлари давомида Ўзбекистон - Тожикистон Республикалари ўртасида савдо алоқаларини кенгайтириш ҳамда ўзаро ҳамкорлик муносабатларини янги босқичга чиқариш, яқин икки йил мобайнида савдо ҳажмини 1 млрд. АҚШ долларига етказиш бўйича аниқ топшириқ ва кўрсатмалар берилган эди.

Ўз навбатида, икки мамлакат тадбиркорлари ўртасидаги ўзаро манфаатларга асосланган иқтисодий муносабатлар кундан кунга ривожланиб бормоқда. Ўзбекистон Савдо-саноат палатасининг Тошкент вилояти ҳудудий бошқармаси кўмагида жорий йилнинг 6-7 июль кунлари Тожикистон Республикасининг Хўжанд шаҳрида Халқаро “СУҒД-2018” кўргазма-ярмаркасида 100 дан ортиқ маҳаллий тадбиркорларимиз иштирок этган бўлиб, уларнинг 42 нафари ўз маҳсулотларини тақдим этди.

Ушбу кўргазма – ярмаркада тадбиркорлар томонидан электротехника воситалари, қурилиш материаллари, озиқ-овқат, трикотаж, косметика, полимер маҳсулотлари, автомобил эҳтиёт қисмлари, муқобил манбалардан фойдаланган ҳолда электр энергия ишлаб чиқарувчи технологик ускуналари намойиш этилди.

Халқаро “СУҒД-2018” кўргазма-ярмаркасида шунингдек, Россия Федерацияси, Бирлашган Араб Амирликлари, Қозоғистон, Қирғизистон, Германия, Ўзбекистон, Жанубий Корея давлатлари тадбиркорлари ҳамда Халқаро ташкилотлар ваколатхоналари вакиллари иштирок этишди.

Мазкур кўргазма давомида Тожикистон Республикасига “Халқаро инвесторларни жалб қилиш, рақобатбардош маҳсулотларни ишлаб чиқариш, қўшни давлатлар билан савдо алоқаларини ривожлантириш” мавзусида конференция ҳам ташкил этилди.

Алоҳида қайд этиш лозим, ўтган давр мобайнида Ўзбекистон Савдо-саноат палатаси кўмагида биргина Хўжанд шаҳрида Ўзбекистон савдо уйи ташкил этилди. “Саховат” бозорида Ўзбекистонлик тадбиркорларнинг маҳсулотлари сотилиш ташкил қилинди. Бозорда 300 та савдо расталари мавжуд бўлиб, ҳозирги кунда 180дан ортиқ савдо расталарида Ўзбекистонлик тадбиркорлар ўзларининг маҳсулотларини сотишмоқда. Маҳаллий ҳокимликлар, ташкилотлар ва идоралар ўртасида ўзар ҳамкорлик алоқалари йўлга қўйилди.

Бугунги кунда Ўзбекистон Савдо-саноат палатасининг Тошкент вилояти ҳудудий бошқармаси ва Суғд вилояти Савдо - саноат палатаси ўртасида ўзаро ҳамкорлик тўғрисида келишув имзоланган. Унга кўра, Тожикистонлик тадбиркорлар Ўзбекистонда ўтказилаётган бизнес форумлар, кооперацион биржаларда иштирок этиб келмоқда. Ўз навбатида Ўзбекистонлик тадбиркорларнинг Тожикистон Республикасида ўтказилаётган бизнес форумлар, кўргазма ярмаркаларда иштирок этиши ташкил қилинмоқда.

Ташкиллаштирилган кўргазма давомида Ўзбекистон ва Тожикистон корхоналари томонидан ўзаро ҳамкорлик тўғрисида меморандумлар имзоланди.

Шу билан бирга, халқаро “СУҒД-2018” кўргазма-ярмаркасида иштирок этган тадбиркорлик субъектлари томонидан жами бўлиб 6 млн. АҚШ доллари миқдорида экспорт шартномалари имзоланди.

Бир сўз билан айтганда, бу каби кўргазмалар мамлакатларимиз ўртасида савдо алоқаларни ривожлантиришда муҳим аҳамият касб этиб, тадбиркорлар томонидан Тожикистон бозорига маҳсулотларни экспорт қилишда муҳим қадам бўлиб хизмат қилади.

Манба: Ўзбекистон Республикаси Савдо саноат палатаси