Иккинчи жаҳон уруши қатнашчиси Абдулла Каримов Самарқанд шаҳридаги Намозгоҳ маҳалласида истиқомат қилади. Бу йил 94 баҳорни қарши олган отахон 18 ёшида фронтга кетиб, етти йилдан сўнг, Ғалабадан кейин ҳам тўрт йил ҳарбий хизматда бўлиб, 1949 йилда она юртига қайтиб келган. 

Самарқанд давлат университетида таҳсил олиб, узоқ йиллар шаҳардаги мактабларда ўқувчиларга ўзбек тили ва адабиёти фанидан дарс берди. Турмуш ўртоғи Хосиятой Каримова билан 7 нафар фарзандни тарбиялаб, уйли-жойли қилди. 

Бугун фарзандлари ҳамда 60 га яқин невара, эвара ва чеваралари камолини кўриб, тинч-осойишта кунларимизга шукрона айтиб яшаётган отахоннинг ҳовлиси ҳар қачонгидан гавжум. Маҳалла аҳли, шаҳар жамоатчилиги вакиллари ушбу файзли хонадонга келиб, Абдулла бобони Хотира ва қадрлаш куни ҳамда Иккинчи жаҳон урушида қозонилган ғалабанинг 73 йиллиги билан табрикламоқда.

Самарқанд вилояти ва шаҳар ҳокимлиги, Марказий ҳарбий округ қўмондонлиги, давлат ва жамоат ташкилотлари вакиллари А.Каримов хонадонига ташриф буюриб, Президентимиз Шавкат Мирзиёевнинг совғаси ва табрик хатини тантанали равишда топширди. 

Самарқанд шаҳар ҳокими Ф.Раҳимов Абдулла бобонинг қўлига давлатимиз раҳбарининг туҳфаси – олтин соатни тақиб қўйиб, табрик хатини ўқиб берди.

Табрикдаги “Дунёни фашизм балосидан асраб қолишга, бугунги ёруғ кунларимизни таъминлашга ҳисса қўшган Сиздек мард ва қаҳрамон юртдошимизга бутун халқимиз номидан чуқур миннатдорлик билдираман”, деган сўзлар Абдулла бобони тўлқинлантириб юборди. 

– Шу кунларга етказганига шукр, – дейди Абдулла Каримов. – Давлатимизнинг, Президентимизнинг доимий эътиборидамиз. Ҳар куни уйимизга келиб, ҳол сўраб туришибди. Ўтган йил байрам арафасида “Дамас” машинаси олган эдик. Бу йил 5 миллион сўм пул мукофоти ва қимматбаҳо совғалар топширишди. Бундай эътибордан бошимиз кўкка етяпти, ёшимизга ёш қўшилмоқда. Илоҳим, юртимизни ёмон кўзлардан асрасин, осмонимиз доим мусаффо, халқимиз омон бўлсин!

Ғолиб Ҳасанов, Алишер Исроилов (сурат) ЎзА

Манба: ЎзА