Кўриниш
Шрифт ўлчами
?
Экран сухандони
Ишлаб чиқилган: 
Ўзбекистон Республикаси
Ҳукумат портали
Мувофиқлаштириш қўмитаси мажлиси
2018-04-17 | МДҲ
17 апрель куни Тошкент шаҳрида МДҲга аъзо давлатлар Мудофаа вазирлари кенгаши ҳузуридаги Ҳаво ҳужумидан мудофаа масалалари бўйича мувофиқлаштириш қўмитасининг навбатдаги мажлиси бўлиб ўтди.
МДҲга аъзо мамлакатларнинг ҳаво ҳужумидан мудофаа бирлашган тизими (ҲҲМ БТ) 1995 йил 10 февраль куни Ҳамдўстликнинг ўн мамлакати ўртасида имзоланган битим асосида ташкил этилган. Бугунги кунда унга Ўзбекистон, Арманистон, Беларусь, Қозоғистон, Қирғизистон, Россия ва Тожикистон киради.
ҲҲМ БТ ташкил этилганидан буён 25 қўмондонлик-штаб ўқув машғулотлари ҳамда ўндан ортиқ жанговар ўқ отиш машғулотларидан иборат қўшма ўқувлар ўтказилди. 1995 йилдан буён мингдан ортиқ ҳарбий авиация парвозлари уюштирилди. Навбатдаги "Жанговар ҳамдўстлик" ўқув машғулотлари 2017 йил сентябрь ойида Россиянинг Астрахань вилояти Ашулук полигонида бўлиб ўтди.
Мувофиқлаштириш қўмитасининг Ўзбекистон Қуролли Кучлари академиясининг Ситуацион марказида бўлиб ўтган мажлисида МДҲ Ижроия қўмитаси раисининг ўринбосари – МДҲ ижрочи котиби ўринбосари Агибай Смагулов, МДҲга аъзо давлатлар мудофаа вазирлари Кенгаши котибияти вакиллари, Арманистон, Беларусь, Қозоғистон, Қирғизистон, Тожикистон ва Ўзбекистон ҲҲМ қўшинлари қўмондонлари иштирок этди.
Мажлисда Ўзбекистон Республикаси мудофаа вазири А.Азизов мамлакатимизда мудофаа соҳасидаги сиёсат Ўзбекистон Республикаси Президенти Шавкат Мирзиёев ташаббуси билан қабул қилинган Ўзбекистон Республикаси Мудофаа доктринаси асосида амалга оширилаётганини таъкидлади. Бошқа давлатларга нисбатан ҳарбий куч ишлатмаслик, бошқа давлатларнинг ички ишларига аралашмаслик, юзага келиши мумкин бўлган низоларни тинчлик йўли билан ҳал этиш, мудофаа жиҳатидан ўзини-ўзи таъминлаш, ҳарбий қурилишнинг замонавий ҳарбий тўқнашувлар хусусиятига мослиги Мудофаа доктринасининг асосий принципларидир. Шунингдек, А.Азизов МДҲ доирасида ҳарбий қурилиш соҳаси жадал ривожланиб бораётгани, бунда МДҲга аъзо давлатлар мудофаа вазирлари Кенгашининг мувофиқлаштирувчи роли ортиб бораётганини таъкидлаб, Мувофиқлаштириш қўмитаси Ҳамдўстлик ҳаво макони мудофаасини мустаҳкамлашда муҳим ўрин тутишини қайд этди.
Мажлисни Мувофиқлаштирувчи қўмита раисининг ўринбосари, Россия Федерацияси Ҳарбий-космик кучлари бош штаби бошлиғи П.Кураченко бошқарди.
Мажлисда ҲҲМ масалалари бўйича Мувофиқлаштириш қўмитаси таркибига ўзгартиришлар киритилди, қўмита ва унинг ишчи органларининг 2017 йилги фаолияти сарҳисоб қилинди. Ҳамдўстликка аъзо давлатлар ҲҲМ бирлашган тизимининг "Минтақавий хавфсизлик–2018" компьютер қўмондонлик-штаб қўшма ўқув машғулотларини ўтказиш таклифи ҳамда Радиолокация бўйича аниқлаш ягона давлат тизимини ривожлантириш концепциясини амалга ошириш режаси лойиҳаси маъқулланди, қўмита фаолиятига доир бошқа масалалар кўриб чиқилди.
Мажлис иштирокчилари ОАВ вакиллари учун брифингда кун тартибидаги барча масалалар муваффақиятли кўриб чиқилганини мамнуният билан қайд этдилар.
Манба: ЎзА
