Маълумки, 2017 йил 14 сентябрда 446-сонли Ўзбекистон Республикасининг қонуни қабул қилинган эди.

Ушбу қонунга биноан «Ихтиролар, фойдали модельлар ва саноат намуналари тўғрисида», «Селекция ютуқлари тўғрисида» ва «Товар белгилари, хизмат кўрсатиш белгилари ва товар келиб чиққан жой номлари тўғрисида»ги қонунларга тегишли ўзгартириш ва қўшимчалар киритилган эди. Ушбу ўзгартиришлар Қонун кучга кирган кундан эътиборан олти ой ўтгач амалга киритилиши белгилаб қўйилган эди. Қонун ижросини таъминлаш мақсадида ўтган давр мобайнида Агентлик томонидан интеллектуал мулк билан боғлиқ айрим Қоидаларга ҳам ўзгартиришлар ва қўшимчалар киритилди, ҳамда Ўзбекистон Республикаси Адлия вазирлиги томонидан рўйхатга олинди. Жумладан, «Фойдали модельга Ўзбекистон Республикасининг патенти берилиши учун талабномаларни тузиш, топшириш ва кўриб чиқиш Қоидалари», «Селекция ютуғи патентининг амал қилишини тиклаш қоидалари», «Товар белгисига ва хизмат кўрсатиш белгисига доир гувоҳноманинг ҳамда товар келиб чиққан жой номидан фойдаланиш ҳуқуқи тўғрисидаги гувоҳноманинг амал қилиш муддатини узайтириш қоидалари», «Ўзбекистон Республикаси Интеллектуал мулк агентлигининг Апеллясия кенгашига апеллясиялар ва аризаларни топшириш ҳамда кўриб чиқиш қоидалари» ва бошқа норматив ҳужжатлар.

Юқорида қабул қилинган қонун ва қонуности ҳужжатлар республикамиз ихтирочилари, тадбиркорлари ва селекционерлари учун янада қулайлик ва кенг имкониятлар яратади.

• Биринчидан, ихтирочилар фойдали модель сифатида эндиликда маҳсулотга (хусусан, қурилма, модда, микроорганизм штаммлари, ўсимликлар ёки ҳайвонлар ҳужайраларининг турларига) ва усулга (моддий воситалар ёрдамида моддий объект устида ҳатти-ҳаракатларни амалга ошириш жараёнига) тааллуқли бўлган техник ечимларни фойдали модель сифатида Агентликка талабнома сифатида топширишлари мумкин. Фойдали модель сифатида муҳофаза қилинадиган объектлар туркумини бундай кенгайтирилиши яратилган интеллектуал мулк объектининг экспертиза муддатларини қисқартиришга ҳамда патент олиш билан боғлиқ ҳаракатларни амалга оширишда тўланадиган патент божларини миқдорини камайтиришга қаратилган.
• Иккинчидан, селекция ютуқларига патент бериш аввал маълумотлар эълон қилинган санадан эътиборан 6 ойдан кейин эмас, балки ўн иш куни ўтгач бериладиган бўлди. Шунингдек, патентнинг амал қилиши тугатилган санадан эътиборан уч йил ичида патент эгаси томонидан илтимоснома топширилса патентининг амал қилишига кўра тикланиши мумкин.
• Учинчидан, корхонанинг ходими бўлган муаллиф бевосита ўз номига патент олиши мумкин бўлган ҳоллар аниқлаштирилди.

Эслатиб ўтамиз қабул қилинган ушбу нормалар 2018 йилнинг 18 мартидан кучга киради.

Манба: Ўзбекистон Республикаси Адлия вазирлиги ҳузуридаги Интеллектуал мулк агентлиги