Тадбирда Ҳиндистон ва хорижий давлатларнинг 400 га яқин компанияларидан 10 мингдан зиёд ишбилармонлар иштирок этди, шу жумладан Ўзбекистон вакиллари ҳам мамлакатимиз индустриал салоҳиятини намойиш этишди.

Миллий павильонда диёримизда ишлаб чиқарилаётган саноат, муҳандислик, текстиль, қишлоқ хўжалиги ва озиқ-овқат маҳсулотлари, уй-рўзғор ва маиший жиҳозлар, машина ва ускуналар тўғрисидаги ахборотномалар, кўргазма плакатлари ва каталоглари, маҳсулотлардан намуналар ўрин эгаллади. 

Хусусан, “Артель”, “Ўзкабел” компаниялари, Андижоннинг “Само” фабрикаси ва бошқа корхоналарда ишлаб чиқарилаётган товарлар ҳақида иштирокчиларга кенг маълумот берилди.

Ўзбекистон павильонининг бир қисми мамлакатимиз сайёҳлик салоҳиятини тарғиб этишга бағишланди. Юртимизнинг қадимий шаҳарлари ва мафтункор масканлари, туристлар учун яратилаётган шарт-шароитлар ҳақида ҳикоя қилувчи босма ва аудиовизуал ахборотларни кўргазма иштирокчиларида катта қизиқиш уйғотди.

Мамлакатимиз кўргазма майдонига ташриф буюрган Ҳиндистон савдо вазирининг ўринбосари Рита Теотия мазкур тадбирда Ўзбекистон вакилларининг иштирокидан мамнун эканини таъкидлаб, республикамизда саноат ва ишлаб чиқариш соҳасида эришилаётган ютуқларга юқори баҳо берди.

Ўзбекистонлик тадбиркорлар кўргазмада ўзларини қизиқтирган йўналишларда замонавий технологиялар билан танишиш ҳамда Ҳиндистон компаниялари билан ўзаро манфаатли келишувларга эришиш имкониятига эга бўлди.

Манба: “Дунё” ахборот агентлиги