Ўзгидрометда 2011 йилдан бери Халқаро стандартлаштириш ташкилоти стандартлари бўйича сифат менежменти тизими (СМТ) жорий этиб келинмоқда. Жаҳон амалиётида стандартлар «энг яхши тажриба»ни акс эттиради. Бу доимий равишда сифат соҳасидаги ишланмаларни эътиборга олган ҳолда ва олдинги версияларни татбиқ этиш натижасида орттирилган тажрибага асосланиб ISO​ Техник кенгашлари томонидан такомиллаштириб келинаётган динамик тузилмадир. Одатда ISO​ Халқаро стандартлари ҳар 5 йилда кўриб чиқилади. Охирги ISO​ 9001:2015 версияси ISO​ 9001:2008 версиясининг ўрнига келди.

Ўзгидромет авиацияни метеорологик таъминлаш бўлинмаларида ҳамда Авиацияни метеорологик таъминлаш хизматида янги ISO 9001:2015 версияси 2017 йил давомида жорий қилинган эди. Ҳозирги вақтда Ўзгидрометнинг 12 та авиаметбўлинмаси ва Авиацияни метеорологик таъминлаш хизмати халқаро даражада янги стандартдаги сифат менежменти тизимига мувофиқлик сертификатларини олди.

Бу жараёнда Германиянинг TÜV​ International Certification (TIC)​ компанияси сертификатлаштириш органи бўлиб хизмат қилди. Бу компания томонидан бериладиган сертификатлар халқаро бозорда юқори ишончга эга бўлиб, жаҳон миқёсида 90 та мамлакатда 10 мингдан ортиқ корхона мазкур сертификатларни олган. Улар орасида «Аэрофлот Россия авиалиниялари» ОАЖ, Sony Technical Service Group, Siemens, Scoda Gruppe, Los-Angeles Airport ва бошқалар бор.

Ҳозирги вақтда ISO​ 9001:2015 сифат менежменти янги тизимини ишчи ҳолатда сақлаш ва назорати бўйича Ўзгидромет авиацияни метеорологик таъминлаш бўлинмалари ва Авиацияни метеорологик таъминлаш хизматида катта ишлар амалга оширилмоқда. Йил давомида бўлинмаларда белгиланган тартибда ички ва кузатув аудитлари ўтказилади.

Манба: Гидрометеорология хизмати маркази