“Ҳунарманд” уюшмаси ҳунармандларга қулайликлар яратиш борасида кенг кўламли ишларни амалга оширмоқда. Жумладан, 2017 йилнинг декабрь ҳолатига кўра, уюшма аъзолари 10 минг 247 нафарни ташкил этган бўлса, жорий йилда улар сафига яна 8 мингдан ортиқ ҳунарманд қўшилди. 

 

Ҳунармандлик маҳсулотларини экспорт қилиш ҳажмини ошириш ҳамда ушбу соҳада халқаро ҳамкорликни мустаҳкамлаш мақсадида жорий йилда дунёнинг 20 дан ортиқ давлатида 113 кўргазма ва ярмарка ўтказиш чоралари кўрилмоқда.

 

Бундан ташқари, уюшма таъсисчилигида "Uz craft and art" масъулияти чекланган жамияти ташкил этилди. Келгусида мазкур корхона тизимида мамлакат туристик объектлари, диққатга сазовор жойлари, ҳудудлардаги ҳунармандлик марказларида ҳамда бир қатор бозорларда "Аср салон"лар, яъни амалий ва тасвирий санъат асарларининг савдоси билан шуғулланувчи дўконлар очилади.

 

– Президентимизнинг фармони асосида ҳунармандларга бир қатор имтиёз ва преференциялар берилди, – дейди уюшма масъул ходими Д.Сатторов. – Унга кўра, энди ҳунармандлар солиқ тўловидан озод этилиши, маҳсулотларини экспорт қилишдан тушган хорижий валютани эркин тасарруф қилиши мумкин. Уларга ер майдонлари ва бинолар ажратиш, муҳандислик-коммуникация тармоқларига уланиш, имтиёзли кредитлар бериш, ҳунармандлик маҳсулотларини сотиш ва экспорт қилиш борасида яратилган қулайликлар асрий анъналаримиз бардавомлигини таъминлашга хизмат қилади. Айниқса, “Уста-шогирд” мактаблари сонини кўпайтириш долзарб масала. Ўтган йили 1 минг 326 та ана шундай мактаб ташкил этилиб, ҳозирги кунда уларнинг сони 2 мингтага етказилди. Уларда ҳунар ўрганаётганлар сони 7 минг 356 нафарни ташкил этмоқда.

 

Мамлакатимизнинг 23 шаҳар ва туманида ҳунармандликни ривожлантириш марказларини ташкил этиш, шу йўналишда 3015 та лойиҳани амалга ошириш галдаги режаларимиздандир.

 

Матбуот анжумани қизғин баҳс-мунозаралар ва савол-жавоблар билан якунланди.