Тахтакўпир туманидаги «Ата кўл» қишлоқ фуқаролар йиғинининг «Мақпал кўл» овулида аҳолининг ичимлик сувига эҳтиёжи қўл насослари орқали таъминланади. Бу эса саломатлик ва санитария борасида қатор муаммоларни юзага келтирмоқда. 

Кока-Кола жамғармаси ва Глобал сув ресурслари муаммолари бўйича ташкилот томонидан Янги олам дастурининг молиявий кўмагида амалга оширилаётган «Оролбўйидаги қишлоқ ҳудудларида ичимлик суви таъминотини яхшилаш» лойиҳаси доирасида 2018 йил охиригача туманда сув тақсимлаш станциясини тиклаш ишлари амалга оширилади. Натижада 2 мингга яқин одам тоза ичимлик сувидан фойдаланиш имконига эга бўлади.

 

Маҳаллий аҳолини жалб қилган ҳолда ижтимоий лойиҳаларни амалга оширишда кўмак бериш БМТнинг ҳудудда амалга оширилаётган «Орол минтақаси учун инсон хавфсизлиги бўйича кўп томонлама шериклик фондини ташкил қилиш орқали Орол фожиасидан жабр кўрган аҳолининг турмуш шароитини яхшилаш» қўшма дастурининг муҳим йўналишларидан бири ҳисобланади. БМТ Тараққиёт дастури, Қорақалпоғистон Республикаси Вазирлар кенгаши ва Тахтакўпир тумани ҳокимлиги ҳамкорлигида амалга оширилаётган мазкур лойиҳа Янги олам дастури томонидан ҳам қўллаб-қувватланди. 

Янги лойиҳа доирасида туман ҳокимлиги ва аҳоли иштирокида таълим ва тиббиёт муассасаларида санитария-гигиена масалаларига бағишланган туркум семинарлар ташкил этилади.