Тошкент шаҳар ҳокими Р.Усмонов жисмоний ва юридик шахслар мурожаатлари билан ишлаш тизими янгиликлари ҳақида гапирди. Таъкидландики, Президентимиз Шавкат Мирзиёев ташаббуси билан халқни эшитиш, аҳолининг талаб ва истакларини рўёбга чиқариш давлат сиёсатининг устувор йўналишига айланди. Пировардида аҳолини йиллар давомида қийнаб келаётган муаммолар ўз ечимини топмоқда. Одамларнинг хоҳиш-истаклари рўёбга чиқмоқда.

Сайёр қабулда маълум қилинишича, 2017 йилда Президент Виртуал ва Халқ қабулхоналарига пойтахт аҳолисидан келиб тушган 294 мингдан ортиқ ариза ва шикоят кўриб чиқилган. Ўрта ҳисобда уларнинг ҳар 3 тасидан 2 таси ижобий ҳал этилган. Бу мурожаатларнинг асосий қисми уй-жой, ер майдонлари ажратиш, суд-ҳуқуқ, моддий ёрдам кўрсатиш, иш билан таъминлаш каби масалаларга дахлдор. 

Ўтган давр мобайнида Ўзбекистон Республикаси Президентининг Тошкент шаҳри ва туманларидаги Халқ қабулхоналари ташаббуси билан давлат идоралари раҳбарларининг 1 мингдан зиёд қабули ташкил этилди. Уларда 6 мингдан ортиқ фуқаро иштироки таъминланди.

Бугунги сайёр қабулда Тошкент шаҳар ҳокими қабулига кириш истагида бўлган 150 фуқаро иштирок этди. Уларнинг мурожаатлари, масалаларини кўриб чиқиш ва ҳал этиш учун пойтахтдаги 63 ташкилотдан масъул ходимлар, туман ҳокимлари ва туманлардаги Халқ қабулхонаси мутасаддилари жалб этилди. 

Сайёр қабулга келган фуқаролар дастлаб туман ҳокимлари, масаласига кўра тегишли ташкилотлар масъул ходимларига мурожаат қилди. Мурожаат туман ва тегишли ташкилот миқёсида ҳал этилмаган ҳолатда бу масалани шаҳар ҳокими ўз ваколати доирасида кўриб чиқди.

Учтепа туманидаги Кўксарой маҳалласидан бир гуруҳ отахонлар уйларига ичимлик суви етиб бормагани ва канализация тизимига уланмагани ҳақида мурожаат билан келишган экан. Сайёр қабулда улар Тошкент шаҳар ҳокими билан шу масалада суҳбатлашди.

– Маҳалламизга 2012 йилда 20 дан зиёд янги оила кўчиб келди. Ана шу хонадонлар ҳозиргача ичимлик суви билан таъминланмаган, – дейди "Кўксарой" маҳалла фуқаролар йиғини раиси Рўзибой Муталов. – Бугун шаҳар ҳокимига мавжуд муаммоларни айтдик. Бу оилаларни ичимлик суви билан таъминлаш бўйича тегишли ташкилотлар мутасаддиларига топшириқ берилди. Канализация тизимига улаш масаласи эса кейинроқ ҳал этиладиган бўлди.

Сайёр қабулда ҳеч бир мурожаат эътиборсиз қолмади. Фуқароларни қийнаб келаётган масалалар баённомага киритилиб, бажарилиш муддатлари белгиланди.

Манба: “Дунё” ахборот агентлиги