Навоий шаҳрида барпо этилаётган 7 қаватли “Garden House” уйлар мажмуасида қурилиш ишлари якунланди. Бу уйларнинг ўзига хослиги шундаки, ҳар бир қаватда кичик боғ ташкил этиб, мевали ва цитрус кўчатлар етиштириш имконияти мавжуд. 

“Навоий комфорт қурилиш сервис” масъулияти чекланган жамияти қурувчилари томонидан 270 хонадонга мўлжаллаб бунёд этилган турар жой биносининг ертўласида болалар учун турли аттракционлар ўрнатилган, кўнгилочар ўйинлар зали фаолият кўрсатмоқда. Биринчи қаватда оилавий ошхона, боулинг зали ва дўконлар жойлашган. Юқори тезликдаги интернет тармоғи аҳоли учун қулайлик яратади. 

– Биноларнинг иситиш тизими марказлаштирилган бўлиб, энг замонавий қозонлар билан жиҳозланган, – дейди “Навоий комфорт қурилиш сервис” масъулияти чекланган жамияти директори ўринбосари Шуҳрат Тиллаев. – Мажмуанинг хусусий уй-жой мулкдорлари ширкати хонадонларга намунали хизмат кўрсатади. 7 қаватли бинонинг ҳар бир қаватидаги кичик айвонда аҳоли дам олиши ҳамда пакана навли дарахт кўчатларини парваришлаши учун кичик боғ майдони ажратилган. Бу инсонга ўзгача завқ бағишлайди. 7-қаватда кичик меҳмонхона жойлашган. Мажмуа ҳовлиси ўралган бўлиб, махсус қўриқлаш хизмати йўлга қўйилган. Болалар учун ёзги чўмилиш ҳавзаси, сунъий қопламали футбол ва волейбол майдонлари барпо этилмоқда. Бино олд қисмида мусиқали фаввора ўрнатилаётир.

Манба: ЎзА