Самарқанд давлат чет тиллар институти ва Россия Федерациясининг Челябинск давлат маданият институти ўртасида имзоланган ҳамкорлик шартномасига асосан 22-23 январь кунлари Челябинск давлат маданият институти халқаро алоқалар бўлими бошлиғи педагогика фанлари доктори профессор Сафаралиев Бозор Сафаралиевич, хорижий тиллар кафедраси мудири доцент Дигина Олга Леонидовна ва «Ахборот Жамияти» илмий-ўқув маркази директори, доцент Гушул Юлия Владимировналар институтига ташриф буюрди ҳамда улар иштирокида семинар-тренинглар ташкил этилди.

Меҳмонлар институт ректори И. Тухтасинов билан расмий учрашувда икки олий таълим муассасалари ўртасида илм-фан, маданият, илмий-тадқиқот соҳаларида ҳамкорлик алоқаларини мустаҳкамлаш, ҳамкорликда қўшма анжуманлар ташкил этиш, илмий мақолалар ва ўқув адабиётлар чоп этиш масалалари юзасидан музокаралар олиб борилди.

Хорижлик мутахассислар иштирокида 22-23 январь кунлари давомида институт профессор-ўқитувчилари, илмий тадқиқотчилари ва ахборот ресурс маркази ходимлари учун «Хорижий тилларни ўқитишда замонавий методлар ва ахборот коммуникация технологияларидан фойдаланиш», «Халқаро ҳамкорликни ривожлантириш тажрибаси» «Россия олий таълим муассасаларининг илмий журналларида илмий мақолаларни чоп этишга қўйиладиган талаблар» «Ахборот маданияти», «Ўқув ва илмий манбалардан фойдаланиш» каби мавзуларда семинар-тренинглар ташкил этилди. Семинар-тренинглар ҳар томонлама фойдали, самарали ва қизиқарли бўлганлиги иштирокчилар томонидан эътироф этилди.

Семинар-тренингларда фаол иштирок этган қатнашчиларга сертификатлар топширилди. Шунингдек, хорижий мутахассисларга институт ректори томонидан ташаккурномалар тақдим этилди.

Манба: Ўзбекистон Республикаси Олий таълим, фан ва инновациялар вазирлиги