Ўзбекистон Республикаси жисмоний тарбия ва спорт давлат қўмитаси, Болалар спортини ривожлантириш жамғармаси ҳамда мамлакатимиз анъанавий каратэ-до федерацияси томонидан ташкил этилган мусобақада 100 га яқин спортчи ката ва кумите йўналишларида ғолиблик учун курашмоқда. 

Шунингдек, мамлакат кубоги доирасида Жаҳон анъанавий каратэ-до федерацияси вице-президенти Радослав Януш каратэчиларимизга ўқув-амалий семинар ва маҳорат сабоқлари ўтди. 

– Мазкур семинар ва маҳорат сабоқлари спортчиларимизнинг тажриба ва маҳоратини янада ошириш, мазкур спорт турида кузатилаётган янгиликлар, қоидаларга киритилган ўзгаришлар ҳақида маълумот олиш имконини бермоқда, – дейди Ўзбекистон анъанавий каратэ-до федерацияси бош котиби Б.Пўлатов. – Ишонамизки, каратэчиларимизнинг олган билим ва кўникмалари нуфузли мусобақаларда муносиб иштирок этишларида қўл келади. 

Семинарда мураббий ва спортчиларга, ката ва кумитедаги янги усуллар, халқаро мусобақаларни юқори савияда ташкил этиш ҳамда янги қонун-қоидалар ҳақида маълумотлар берилди. 

Жавоҳир Тошхўжаев, ЎзА

Манба: ЎзА