Берлинда Ўзбекистон Республикасининг Германия Федератив Республикасидаги Фавқулодда ва Мухтор элчиси Набижон Қосимов Германия Федерал президенти Франк-Валтер Штайнмаерга ишонч ёрлиқларини топшириш маросими бўлиб ўтди.

Маросимдан кейин кечган суҳбат чоғида Ўзбекистон Республикаси ва Германия Федератив Республикаси ўртасидаги икки томонлама муносабатлар билан боғлиқ масалалар муҳокама этилди.

Ф.-В.Штайнмаер ГФР Ўзбекистонга Марказий Осиёдаги муҳим шерик сифатида қарашини ҳамда кенг қамровли масалалар юзасидан ўзаро ҳамкорликни янада мустаҳкамлашдан манфаатдор эканлигини қайд этди.

Икки мамлакат ўртасидаги дўстона алоқалар ижобий тусда эканлиги қайд этилгани баробарида ўзаро манфаатли ҳамкорликни ривожлантириш учун катта салоҳиятнинг мавжудлиги таъкидланди.

ГФР Федерал президенти икки томонлама ҳамкорлик фаоллашишига умид билдирар экан, Ўзбекистон раҳбарияти ҳамда халқига муваффақиятлар ва фаровонлик тилади.

Манба: “Дунё” ахборот агентлиги