Самарқандда Ўзбекистон Республикаси ва Корея Республикаси ўртасида дипломатик муносабатлар ўрнатилганининг 25 йиллиги ҳамда корейс миллатига мансуб юртдошларимиз мамлакатимизда яшаётганининг 80 йиллиги муносабати билан маданий дастур намойиш этилди.

Самарқанд, Бухоро ва Навоий вилоятларида истиқомат қилаётган корейс миллатига мансуб юртдошларимиз, миллий маданий марказлар, давлат ва жамоат ташкилотлари вакиллари иштирок этган тадбир “Корейслар диаспораси: Ўзбекистон заминида 80 йил” номли ҳужжатли фильм намойиши билан бошланди. 

Фильмда 1937 йилда юртимизга кўчириб келтирилган корейсларнинг халқимиз бағрикенглиги ва очиқ кўнгиллилиги туфайли тинч, осуда ҳаёт кечираётгани, жамиятда ўз ўрнини топгани, оғир дамларда қийинчиликларни биргаликда енгиб ўтгани тарихий маълумотлар асосида баён этилган. Корейс диаспорасининг давлатимиз ижтимоий-иқтисодий ҳаётидаги фаол иштироки, уларнинг ўз миллий анъана ва қадриятларини ривожлантириши учун яратилган шароитлар ҳақида ҳикоя қилинган. 

Тадбирда Самарқанд вилояти ҳокими ўринбосари, вилоят хотин-қизлар қўмитаси раиси М.Ғафурова юртимизда яшаётган корейс миллати вакилларини табриклаб, мамлакатимизда миллатлараро тотувлик ва бағрикенгликни мустаҳкамлаш борасида амалга оширилаётган ишлар ҳақида сўз юритди. Корейс миллатига мансуб юртдошларимизнинг вилоят ижтимоий-иқтисодий ҳаётидаги фаол иштироки, фидокорона меҳнати эътироф этилиб, уларнинг бир гуруҳига вилоят ҳокимлигининг фахрий ёрлиқ ва эсдалик совғалари топширилди.

Манба: ЎзА