Tadbirda Samarqand viloyati hokimi o‘rinbosari, viloyat xotin-qizlar qo‘mitasi raisi M.G‘afurova yurtimizda yashayotgan koreys millati vakillarini tabriklab, mamlakatimizda millatlararo totuvlik va bag‘rikenglikni mustahkamlash borasida amalga oshirilayotgan ishlar haqida so‘z yuritdi. Koreys millatiga mansub yurtdoshlarimizning viloyat ijtimoiy-iqtisodiy hayotidagi faol ishtiroki, fidokorona mehnati e’tirof etilib, ularning bir guruhiga viloyat hokimligining faxriy yorliq va esdalik sovg‘alari topshirildi. 

– Biz O‘zbekistonda tug‘ilib o‘sganimiz, shu zaminda baxtli hayot kechirayotganimizdan xursandmiz, – deydi Samarqand viloyati koreys milliy madaniy markazi raisi Nikolay Kim. – O‘z milliy an’ana va qadriyatlarimizni asrab-avaylash va rivojlantirish uchun davlatimiz tomonidan barcha sharoit yaratilgan. Bayram va milliy marosimlarimizni o‘zbek xalqi bilan birga nishonlaymiz. Farzandlarimiz ham turli millat vakillari bilan birga ta’lim olib, kasb-hunar egallamoqda, mehnat qilmoqda. 

Tadbirda sana munosabati bilan o‘tkazilgan shaxmat musobaqasi va turli tanlovlar g‘oliblari tashkilotchilar tomonidan munosib taqdirlandi. 

Viloyat san’atkorlari, milliy madaniy markazlar ansambl va xalq badiiy jamoalari tomonidan konsert dasturi namoyish etildi.