Қарши. Қашқадарё вилоятида ҳам Ўзбекистон Республикаси Президенти сайлови юксак савияда ўтмоқда.

Вилоятда ташкил этилган 867 сайлов участкасида сайловчилар учун барча шароит яратилган. Она ва бола, тиббиёт хоналари зарур жиҳозлар билан таъминланган.

Вилоят бўйича рўйхатга олинган 1 миллион 903 мингдан зиёд сайловчининг 4 минг 55 нафари биринчи марта овоз бераётган ёшлардир.

Қамаши туманидаги 788-Сарбозор сайлов участкасида овоз беришни Ўзбекистон Қаҳрамони, "Бозор ўғли Абди" фермер хўжалиги раиси Абдимурод Бозоров бошлаб берди.

–Мамлакатимизда фермерлик ҳаракатини ривожлантиришга қаратилаётган алоҳида эътибор аҳоли фаровонлигини янада юксалтиришга хизмат қилмоқда, – дейди А.Бозоров. – Ўзбекистон Республикаси Президенти сайлови муҳим сиёсий воқеа бўлиб, унинг натижалари Ватанимиз ва халқимиз тақдирига бевосита дахлдордир. Сайловолди тарғибот-ташвиқот тадбирларида номзодларнинг сайловолди дастури билан тўлиқ танишиб чиқдим. Юртимиз тараққиёти ва халқимиз фаровонлигини юксалтиришга, мамлакатимизнинг халқаро майдондаги нуфузини янада мустаҳкамлашга хизмат қиладиган муносиб номзодга овоз бердим.

Сайлов участкаларида овоз беришга келолмайдиган сайловчиларга қулайлик яратишга ҳам алоҳида эътибор қаратилмоқда.

Яккабоғ туманидаги 683-участка сайлов комиссияси аъзолари "Саховат" уйида яшаётган кексалар ва ногиронларнинг овоз беришини ташкил этиш учун сайлов қутилари билан бу ерга келди.

– Мамлакатимизда биз каби ижтимоий ҳимояга муҳтож қатлам вакиллари учун барча шароит яратилган, – дейди 82 ёшли Ғани бобо Умаров. – Ўз конституциявий ҳуқуқимизни ифода этишимиз учун сайлов қутиси шу ерга олиб келиниши ҳам давлатимиз сиёсатининг инсонпарварлигидан далолат беради.

Манба: ЎзА