Тошкентдаги халқаро Вестминстер университетида ёшларнинг бизнес ташаббусларини қўллаб-қувватлаш бўйича уч ойлик дастур бошланди. Мазкур дастурда талабалар қатор йўналишларни ўз ичига олган АКТ лойиҳалари билан иштирок этмоқда.

Лойиҳа Ўзбекистон Савдо-саноат палатаси томонидан мамлакатимиз Фан ва технологиялар агентлиги, БМТ Тараққиёт дастурининг “Ўзбекистон бизнес форуми (3-босқич)” қўшма лойиҳаси ва «Sasol» компанияси ваколатхонаси билан ҳамкорликда амалга оширилмоқда. 

Ўзбекистон савдо-саноат палатаси раиси ўринбосари Б.Асадов, Тошкентдаги халқаро Вестминстер университети ректори К.Каримов ва бошқалар мамлакатимизда кичик бизнес ва хусусий тадбиркорликни ривожлантиришга катта эътибор қаратилаётганини таъкидлади. Хусусан, ёшларнинг бу борадаги интилиш ва ташаббусларини қўллаб-қувватлаш, уларнинг бизнес лойиҳаларини молиялаштириш давлат сиёсатининг энг муҳим йўналишларидан бири сифатида белгилаб қўйилган. 

Мазкур дастурда мамлакатимиздаги олий ўқув юртларида таҳсил олаётган тўқсонга яқин йигит-қиз қирқдан ортиқ лойиҳа билан қатнашмоқда. Жамоалар дастурий иловалар бўйича лойиҳалардан ташқари, муҳандислик-техник ечимлар борасидаги ишланмаларни ҳам тақдим этган. 

Семинарда ёшлар турли йўналишларни қамраб олган дастурлар, маҳорат дарслари, учрашувлар ва бошқа тадбирларда қатнашади, ўз бизнес-лойиҳаларини ҳимоя қилади.

Манба: ЎзА