Кўриниш
Шрифт ўлчами
?
Экран сухандони
Ишлаб чиқилган: 
Ўзбекистон Республикаси
Ҳукумат портали
“Ватанга қасамёд” монументи пойида ёш офицерларга дипломлар топширилди
2017-06-28 | Таълим
Ўзбекистон Республикаси Мудофаа вазирлигининг олий ҳарбий таълим муассасаларида лейтенант унвонини олган ёш офицерлар битирувига бағишланган тадбирлар бўлиб ўтди. Уларда давлат ва жамоат ташкилотлари, Мудофаа вазирлиги ҳузуридаги Жамоатчилик кенгаши вакиллари ҳамда битирувчиларнинг ота-оналари ва яқинлари иштирок этди.
Тошкент тиббиёт академияси ҳузуридаги ҳарбий-тиббиёт факультети битирувчиларига диплом ва кўкрак нишонлари “Ватанга қасамёд” монументи пойида топширилди. Тиббий хизмат офицерлари тайёрлаш тизимини янада такомиллаштириш, Ўзбекистон Республикаси Қуролли Кучлари тиббий таркиби ходимларининг малакасини ошириш ва уларни қайта тайёрлаш мақсадида 2012 йил 10 июлда Вазирлар Маҳкамасининг “Тошкент тиббиёт академияси ҳузурида ҳарбий-тиббиёт факультетини ташкил этиш тўғрисида”ги қарори қабул қилинди.
– Давлатимиз раҳбари тиббий хизмат кўрсатиш сифатини янада яхшилаш бўйича соҳа олдига катта вазифалар қўйди, – дейди Тошкент тиббиёт академияси ҳузуридаги ҳарбий-тиббиёт факультетининг ҳарбий токсикология ва тиббий муҳофаза курси бошлиғи Соли Ярашев. – Ушбу вазифалар ижросини таъминлаш мақсадида факультетимизда ҳам бўлажак ҳарбий шифокорларни ўқитиш сифатини ошириш, мамлакатимизнинг бу борадаги бой илмий салоҳиятидан янада самарали фойдаланишга қаратилган улкан ўзгаришлар амалга оширилмоқда.
Ўзбекистон Республикаси мудофаа вазири ўринбосари Жаҳонгир Мелибоев ва бошқалар битирувчиларни ушбу унутилмас воқеа билан табриклаб, уларга келажакда муваффақият тилади.
– Ўғлимнинг битирув маросимига Самарқанддан турмуш ўртоғим билан келдик, – дейди лейтенант Муҳаммад Омоновнинг отаси Равшан Тоштемиров. – Тўнғич ўғлим Азиз фермер, пахта, буғдой ва мевалар етиштиради. Кенжа ўғлим Муҳаммад эса шарафли Ватан ҳимоячиси касбини танлади. Мамлакатимизда фуқаролар саломатлигини мустаҳкамлашга алоҳида эътибор қаратилмоқда. Фарзандимиз ҳам шундай шарафли касбни эгаллаб, инсонлар саломатлигини ҳимоя қилишга ҳисса қўшиши билан фахрланамиз.
Қуролли Кучлар Академияси умумқўшин факультети, Муҳаммад ал-Хоразмий номидаги Тошкент ахборот технологиялари университетининг махсус факультетида ҳам шундай тадбирлар бўлиб ўтди. Қалбида Ватан ва ҳарбий бурчга садоқат туйғуси жўш уриб турган бу ёш офицерлар мамлакатимиз суверенитети ва ҳудудий яхлитлигини ишончли ҳимоя қилишга тайёр. Оқ йўл сизга, лейтенантлар!
