O‘zbekiston Respublikasi Mudofaa vazirligining oliy harbiy ta’lim muassasalarida leytenant unvonini olgan yosh ofitserlar bitiruviga bag‘ishlangan tadbirlar bo‘lib o‘tdi. Ularda davlat va jamoat tashkilotlari, Mudofaa vazirligi huzuridagi Jamoatchilik kengashi vakillari hamda bitiruvchilarning ota-onalari va yaqinlari ishtirok etdi.

Toshkent tibbiyot akademiyasi huzuridagi harbiy-tibbiyot fakulteti bitiruvchilariga diplom va ko‘krak nishonlari “Vatanga qasamyod” monumenti poyida topshirildi. Tibbiy xizmat ofitserlari tayyorlash tizimini yanada takomillashtirish, O‘zbekiston Respublikasi Qurolli Kuchlari tibbiy tarkibi xodimlarining malakasini oshirish va ularni qayta tayyorlash maqsadida 2012-yil 10-iyulda Vazirlar Mahkamasining “Toshkent tibbiyot akademiyasi huzurida harbiy-tibbiyot fakultetini tashkil etish to‘g‘risida”gi qarori qabul qilindi. 

– Davlatimiz rahbari tibbiy xizmat ko‘rsatish sifatini yanada yaxshilash bo‘yicha soha oldiga katta vazifalar qo‘ydi, – deydi Toshkent tibbiyot akademiyasi huzuridagi harbiy-tibbiyot fakultetining harbiy toksikologiya va tibbiy muhofaza kursi boshlig‘i Soli Yarashev. – Ushbu vazifalar ijrosini ta’minlash maqsadida fakultetimizda ham bo‘lajak harbiy shifokorlarni o‘qitish sifatini oshirish, mamlakatimizning bu boradagi boy ilmiy salohiyatidan yanada samarali foydalanishga qaratilgan ulkan o‘zgarishlar amalga oshirilmoqda. 

O‘zbekiston Respublikasi mudofaa vaziri o‘rinbosari Jahongir Meliboyev va boshqalar bitiruvchilarni ushbu unutilmas voqea bilan tabriklab, ularga kelajakda muvaffaqiyat tiladi.