Доҳа шаҳрида таэквондо (WTF) бўйича давом этаётган Қатар очиқ чемпионатида ҳамюртларимиз муносиб иштирок этмоқда.

Нуфузли мусобақада тўрт юз нафардан зиёд спортчи ғолиблик учун куч синашмоқда.

Катталар ўртасида вазни 74 килограммгача бўлган спортчилар баҳсида Никита Рафалович олтин медални қўлга киритган бўлса, дунё рейтингида пешқадамлик қилаётган тажрибали спортчимиз Жасур Бойқўзиев 87 килограмм вазнда мусобақанинг кумуш медали билан тақдирланди. Максим Рафалович, Сарварбек Шералиев, Дмитрий Шокин ўз вазн тоифасида учинчи ўринни эгаллади.

Болалар, ўсмирлар ва кадетлар ўртасидаги мусобақада Ниёз Пўлатов, Камронбек Яхшибоев, Саидолим Нўмонов олтин, Шукурхон Султонов, Акобир Акромов, Абдулло Тўйчиев кумуш медалга сазовор бўлди.

Қизлар ўртасида Влада Пан, Мадинабону Маннопова ўз вазн тоифасида шоҳсупанинг энг юқори поғонасига кўтарилди.

Манба: ЎзА