Қарши шаҳрида эркаклар ва хотин-қизлар ўртасида теннис бўйича халқаро турнир бошланди.

Халқаро теннис федерацияси – ITF мусобақалар тақвимидан жой олган ушбу мусобақада ўндан зиёд мамлакатдан келган маҳоратли теннисчилар бош соврин учун баҳс олиб бормоқда. 

Мусобақанинг эркаклар ўртасидаги яккалик баҳслари биринчи даврасида иқтидорли теннисчимиз Санжар Файзиев россиялик Денис Матцукевичга қарши кортга чиқди. Учрашувда ўзининг аниқ тўп узатмалари билан рақибидан устунлик қилган Санжар ҳар иккала сетда 6:4 ҳисобида зафар қучди. 

Ушбу даврада қуръа натижасига кўра, икки нафар теннисчимиз навбатдаги босқичга чиқиш учун куч синашди. Унда тажрибали Темур Исмоилов ёш спортчимиз Амал Султонбеков устидан ғалаба қозонди. 

Турнирнинг хотин-қизлар ўртасидаги жуфтлик баҳсларида теннисчимиз Нигина Абдураимова монтенегролик Ана Веселинович билан бирга рус теннисчилари Екатерина Казионова ҳамда Олеся Первушинани мағлубиятга учратди ва чорак финал йўлланмасини қўлга киритди. 

Манба: ЎзА