Кўриниш
Шрифт ўлчами
?
Экран сухандони
Ишлаб чиқилган: 
Ўзбекистон Республикаси
Ҳукумат портали
Тўйлар муборак, келин-куёвлар
2017-04-24 | Жамият
Халқ билан мулоқот ва инсон манфаатлари йилида аҳолининг ижтимоий ҳимояга муҳтож қатламларини моддий ва маънавий қўллаб-қувватлашни кучайтириш, жамиятимизда ҳамжиҳатлик, меҳр-оқибат, бағрикенглик ва хайр-саховат муҳитини янада мустаҳкамлашга алоҳида эътибор қаратилмоқда.
Ўзбекистон Касаба уюшмалари федерацияси томонидан бир қатор жамоат ташкилотлари иштирокида жорий йилнинг 20 апрелидан 26 майигача мамлакатимиздаги эҳтиёжманд оилалар ва Меҳрибонлик уйларида тарбияланган 620 жуфт келин-куёвнинг никоҳ ҳамда 3 минг 280 боланинг суннат тўйи ўтказилаётгани ҳам ҳар бир фуқаро давлатимиз ва ҳукуматимиз эътиборида эканининг амалдаги ифодасидир.
Ушбу хайрия тадбири ижтимоий кўмакка муҳтож инсонларнинг кўнглини кўтариш, турмуш фаровонлигини оширишга муносиб ҳисса қўшишдек олижаноб мақсадга хизмат қилади.
21 апрель. Бухоро шаҳридаги “Паризод” тўйхонаси байрамона безатилган. Даврага бирин-кетин кириб келаётган келин-куёвлар карнай-сурнай садолари остида миллий анъаналаримизга мувофиқ кутиб олинди.
Йигит-қизларнинг ота-оналари, қариндошлари, маҳалла фаоллари, фахрийлар, жамоатчилик вакиллари ва ёшлар иштирок этган никоҳ тўйида ҳар бир туманнинг ўзига хос хусусиятлари ҳисобга олинган ҳолда ишлаб чиқилган тадбирлар дастури даврага ўзгача шукуҳ бағишлади.
Албатта, оила қураётган ёшларнинг турмуш фаровонлиги уларнинг бандлик даражасига, барқарор иш ўрнига ҳам боғлиқ. Бинобарин, никоҳ тўйлари арафасида келин-куёвларнинг иш билан таъминланган ё таъминланмагани ўрганилиб, ишсизлари тегишли тартибда ишга жойлаштирилди. Тантанали маросимда уларга меҳнат дафтарчалари ҳам топширилди.
– Бугун мен ва рафиқам Маҳлиёхон дунёдаги энг бахтиёр жуфтликмиз, – дейди Жўра Каштиев. – Никоҳ тўйимизда давлат ва жамоат ташкилотлари вакиллари, пойтахтдан келган меҳмонлар иштирок этгани унутилмас воқеа бўлди. Бугунги даврада ҳар бир ёш давлатимиз ва жамиятимизнинг эътиборида эканини янада чуқур ҳис этдик.
Тантанали маросимда Ватан, оила, эзгулик, меҳр ва садоқатни тараннум этувчи тароналар, Бухорога хос мавриги қўшиқлар янгради.
Тадбирда Бухоро вилояти ҳокими Ў.Барноев сўзга чиқди.
Манба: ЎзА
