2018-11-07

Мамлакатимизнинг Малайзиядаги Элчихонаси кўмагида 2018 йилнинг 7-12 ноябрь кунлари Ўзбекистонда «Нақшбандия туристик фестивали» бўлиб ўтади. Тадбир Малайзиянинг “World Sufi Center”​ Жаҳон суфийлар маркази томонидан ташкиллаштирилмоқда.

Шакл ва миқёси бўйича шу кунга қадар ўхшаши бўлмаган фестивалдан кўзланган асосий мақсад буюк ўзбек мутафаккирларининг Ислом ва дунё тамаддуни тараққий топишига қўшган хизматлари учун ҳурмат бажо келтириш, шунингдек муқаддас қадамжоларга ташриф буюриш, диний маросимларда иштирок этиш ва Ўзбекистоннинг бошқа «Зиёрат-туризм» объектлари билан танишиш ҳисобланади.

Жаҳон суфийлари маркази тадбир тўғрисида тарқатма рисолаларни ва реклама ролигини тайёрлади, шунингдек Ўзбекистондаги сайёҳлик компанияси билан биргаликда Малайзия ва бошқа давлатларнинг сайёҳлик бозорида сотиш учун туристик пакетларни ишлаб чиқди.

Тадбирда бутун дунёдан, хусусан Малайзия, Индонезия, Туркия, Буюк Британия, Янги Зеландия, Хитой, Ҳиндистон, Австралия, АҚШ, Жанубий Африка Республикаси ва бошқа давлатлардан Нақшбандия суфийлик тариқатининг 150 дан ортиқ намоёндаси, шу жумладан 10 дан ортиқ машҳур уламоларнинг иштирок этиши кутилмоқда.

Манба: Ўзбекистон Республикаси Ташқи ишлар вазирлиги