O‘zbekiston davlat drama teatrida "Atirgullar qismati" deb nomlangan yangi spektaklning premyerasi bo‘lib o‘tdi. 

...Sahnadagi shifoxona palatasida farzand ko‘rish arafasidagi ayollar o‘zaro suhbatlashmoqda. Lola o‘g‘il ko‘rsa, turmush o‘rtog‘i mashina sovg‘a qilishidan jo‘shib so‘zlamoqda. Zuhra umr yo‘ldoshi nojo‘ya yo‘llarga yurib ketganidan noliydi. Hafiza pul topib, aql topmagan "xo‘jayin"ining qilmishlaridan dog‘da. Hali kollejni bitirmasdan turmush qurgan Orzigul necha yildirki, tirnoqqa zor... 

Qo‘chqor Norqobilov va Xosiyat Rustamova qalamiga mansub ushbu sahna asari ayollar uchun eng oliy baxt – fayzli oilaga beka, komil farzandlarga ona bo‘lish ekani haqida hikoya qilishi bilan tomoshabinlarda katta taassurot qoldiradi. Lirik drama janridagi ushbu spektakl har qanday sharoitda ham ishonch va umid inson uchun qo‘shqanot ekani, aynan shu tuyg‘ular sababli odamzod taqdirning turli sinov va zarbalariga bardosh berishini tomoshabinlarga eslatishi bilan e’tiborga molikdir. 

– Ayrim ayollar hayotda uchrab turuvchi ba’zi qiyinchiliklarga chalg‘ib, eng buyuk baxt – onalik baxti ekanini unutib qo‘yadi, – deydi spektakl rejissyori G‘afur Mardonov. – Spektakl onalik dunyoning barcha hoyu havaslaridan ustun, mehr va muhabbat, baxt va oila inson uchun eng oliy va muqaddas tushunchalar ekanini aks ettiradi. 

Sahnalashtiruvchi rassom Ilhom Rustamov tomonidan yaratilgan dekoratsiya va bezaklar spektaklning ta’sirchan va hayotiyligini ta’minlagan. Asosiy rollarni O‘zbekiston xalq artisti Aziza Begmatova, artistlar Muhabbat Abdullayeva, Tamara Mirmaqsudova, Nafisa Toshmatova, Izrohat Murodova, Yulduz Haydarova, Shahlo Hojiyeva ijro etmoqda.