2017-yilning 24-yanvar kuni Qobul shahrida O‘zbekiston Respublikasi Tashqi ishlar vaziri Abdulaziz Kamilov Afg‘oniston Islom Respublikasi Hukumatining Ijrochi Raisi Abdulla Abdulla bilan uchrashdi.

Suhbat chog‘ida savdo-iqtisodiy, transport-kommunikatsiya va investitsiya sohalarida hamkorlikni yanada rivojlantirishning ustuvor yo‘nalishlari muhokama qilindi.

Uchrashuvda ta’kidlanganidek, bugun O‘zbekiston va Afg‘oniston o‘zaro tovar ayirboshlash hajmini oshirish uchun yetarli imkoniyatga ega bo‘lib, mazkur ko‘rsatkich 2016-yilning yanvar-oktabrida 429 million AQSh dollarini tashkil etdi. Shu nuqtayi nazardan Afg‘onistonda “O‘zsanoateksport” tashqi savdo kompaniyasining savdo uyi o‘z faoliyatini boshlashiga ikki tomon ham muhim ahamiyat qaratadi.

Abdulla Abdulla hozircha Afg‘onistonda yagona Hayraton – Mozori Sharif temiryo‘l liniyasini qisqa muddat ichida qurilishi va foydalanishga topshirilishi hamda yuqori malakali injener-texnik xodimlar tayyorlashdagi yordami uchun O‘zbekiston tomoniga minatdorchilik bildirdi.

Uchrashuvda energetika sohasida, Afg‘onistonning ijtimoiy-iqtisodiy tiklanishi va infratuzilma obyektlariga oid yangi qo‘shma loyihalarni amalga oshirish istiqbollari batafsil ko‘rib chiqildi.