Joriy yilning 28 noyabr kuni Markaziy saylov komissiyasi raisi M.Abdusalomov O‘zbekiston Respublikasi Prezidenti saylovini yoritish bo‘yicha Respublika matbuot markazida saylovni yoritish uchun mamlakatimizga kelgan Rossiyaning yetakchi ommaviy axborot vositalari vakillari bilan uchrashdi.

MSK Raisi jurnalistlarni saylov komissiyalari tomonidan saylovga tayyorgarlik ko‘rish va uni o‘tkazish bo‘yicha asosiy tadbirlar dasturi ijrosi doirasida amalga oshirilayotgan ishlar bilan tanishtirdi.

Uchrashuvda O‘zbekiston davlat boshqaruvi tizimida Prezidentlik instituti asosiy o‘rin tutishi alohida ta’kidlandi. Konstitutsiyada mustahkamlab qo‘yilganidek, Prezident davlat boshlig‘idir va davlat hokimiyati organlarining kelishilgan holda faoliyat yuritishini hamda hamkorligini ta’minlaydi. Prezident fuqarolarning huquqlari va erkinliklariga, O‘zbekiston Respublikasining Konstitutsiyasi va qonunlariga rioya etilishining kafilidir.

O‘zbekiston Respublikasi Prezidenti saylovi to‘g‘risidagi qonunchilikka 2015-yil dekabr oyida kiritilgan o‘zgartish va qo‘shimchalar saylov amaliyotini yanada takomillashtirishga, fuqarolarning saylovda erkin ishtirok etishi uchun shart-sharoitlarni kengaytirishga, Prezidentlikka nomzodlarga saylovoldi tashviqoti davrida keng va teng imkoniyatlar yaratishga qaratilgan.

Muloqot chog‘ida qayd etilganidek, saylovning ochiqligi va oshkoraligini, jurnalistlarning saylov kampaniyasiga taalluqli axborotlardan keng foydalanishini ta’minlash maqsadida Prezident saylovini yoritish bo‘yicha Respublika matbuot markazi va okrug saylov komissiyalarining matbuot markazlari faoliyat ko‘rsatmoqda. Ular tomonidan bugungi kunga qadar saylov kampaniyasining muhim bosqichlariga bag‘ishlangan qariyb 100 ta matbuot anjumani va brifinglar o‘tkazildi. Markaziy va okrug saylov komissiyalari tomonidan mahalliy va xorijiy ommaviy axborot vositalarining 1 ming 306 nafar vakillari akkreditatsiyadan o‘tkazildi.

Saylov kampaniyasi e’lon qilinganidan boshlab shu kunga qadar mamlakatimiz va chet el ommaviy axborot vositalarida 15 ming 845 ta material e’lon qilindi.

Uchrashuvda Rossiya ommaviy axborot vositalari vakillari o‘zlarini qiziqtirgan savollarga javob oldi.