Hindistonda futbol bo‘yicha o‘n olti yoshgacha bo‘lgan o‘smirlar o‘rtasida o‘tkazilayotgan Osiyo chempionatida O‘zbekiston o‘smirlar terma jamoasi yamanlik tengdoshlari ustidan 1:0 hisobida g‘alaba qozondi.

Terma jamoamiz guruhdagi dastlabki uchrashuvda tailandliklarni 5:3 hisobida mag‘lubiyatga uchratgan edi. 

Guruhdagi ikkinchi o‘yin ham keskin va murosasiz kechdi. Uchrashuvning 69-daqiqasida Asadbek Sobirjonov tomonidan kiritilgan yagona gol terma jamoamizga g‘alaba keltirdi. 

O‘zbekiston o‘smirlar terma jamoasi olti ochko bilan guruhdagi yetakchilik mavqeini mustahkamlab oldi. Futbolchilarimiz navbatdagi o‘yinni 23-sentabr kuni KXDR terma jamoasiga qarshi o‘tkazadi.