Beshariq tumani Rapqon qishlog’idagi BO’SM da mustaqilligimizning 25 yilligiga bag’ishlab “Go’zal va betakrorimsan, muqaddas Vatanim, jonim senga fido O’zbekistonim!” shiori ostida boks bo’yicha 2002-2003-yillarda tug’ilgan o’smirlar o’rtasida an’anaviy VII-xalqaro turnir o’tkazildi.

Unda  respublikamizning barcha viloyatlari hamda qo’shni Qozog’iston  Respublikasidan 200 nafardan ziyod sportchilar ishtirok etdi, 16 ta vazn toifasida o’zaro kuch sinashdi.

Quvonarlisi  shundaki, 16 nafar g’olibning 8 nafari viloyatimiz vakillaridir.  “Rapqon” boks maktabi tarbiyalanuvchisi Jamshid Ergashev, qo’qonlik Avazbek  Yo’ldoshev, Farg’ona shahridan Muhammadqodir  Mo’minjonov va Mirjalol Tojievlar barcha raqiblarni mag’lub etishdi. Turnirda  respublikamizning eng kuchli  bokschilari ishtirok etdi.  G’oliblikni qo’lga kiritgan 8 nafar vakillarimiz O’zbekiston o’smirlar terma jamoasi tarkibiga qabul qilindi.

Umumjamoa hisobida viloyatimiz terma jamoasiga birinchi, andijonliklarga ikkinchi, buxoroliklarga  uchinchi va Chimkent viloyati  vakillariga  to’rtinchi o’rin nasib etdi.

G’oliblarga  Bolalar sportini rivojlantirish jamg’armasi  viloyat bo’limi   va tuman  hokimligining diplom, medal, qimmatbaho sovg’alari topshirildi.

Xalqaro turnirning  taqdirlash  marosimida   senatorlar  P. Matkarimov, Sh. Yo’ldoshev, tuman BO’SM direktori, R. Majidovlar  qatnashib, g’oliblar va barcha  yig’ilganlarni mustaqilligimizning qutlug’ 25 yillik bayrami bilan muborakbod etishdi.