O‘zbekiston Qishloq xo‘jaligi vaziri Aziz Voitov Osiyo taraqqiyot bankining Markaziy va G‘arbiy Osiyo departamenti, Atrof-muhit, tabiiy resurslar va qishloq xo‘jaligi bo‘limi direktori Yasmin Siddiqi bilan uchrashuv o‘tkazdi.

Unda O‘zbekiston qishloq xo‘jaligi tizimida vazirlik tomonidan sohani modernizatsiya qilish, fermerlarga xizmat ko‘rsatishning yangi tizimini yo‘lga qo‘yish, butun oziq-ovqat zanjirida ishtirok etuvchilarning imkoniyatlarini oshirish va o‘zaro hamkorligini mustahkamlash bo‘yicha amalga oshirilayotgan ishlar haqida ma’lumot berildi. Shuningdek, 2023-yildan boshlab, Davlatimiz rahbari topshirig‘iga asosan chorvachilik, ipakchilik, baliqchilik, o‘simliklar himoyasi, veterinariya kabi sohalarda Qishloq xo‘jaligi vazirligi yagona davlat siyosatini yurituvchi davlat tashkilotiga aylantirilgani ta’kidlab o‘tildi.

Muloqot davomida  Osiyo taraqqiyot banki O‘zbekiston qishloq xo‘jaligi sektorining uzoq yillik va ishonchli hamkori sifatida qayd etilib, hozirgi kunda Osiyo taraqqiyot bankining vazirlik bilan amalga oshirayotgan 3 ta loyihasining umumiy qiymati 347 million dollarni tashkil etishi va bugungi kunga qadar, ushbu loyiha doirasida ijobiy natijalarga erishilganligi e’tirof etildi.

Muzokaralarda, shuningdek,  kelgusida vazirlik va Osiyo taraqqiyot banki hamkorligida umumiy qiymati 130 million dollarlik 2 ta yangi loyiha hujjatlari ishlab chiqilayotgani ma’lum qilindi.

Uchrashuv yakunida Qishloq xo‘jaligi vazirligi va Osiyo taraqqiyot banki o‘rtasida qishloq xo‘jaligida qo‘shimcha qiymat zanjirini yanada rivojlantirish va oziq-ovqat tizimining barqarorligiga erishish uchun hamkorlikni yanada kuchaytirishga kelishib olindi.

Manba: O‘zbekiston Respublikasi Qishloq xo‘jaligi vazirligi