Kecha yurtimizda o‘tayotgan  futbol bo‘yicha 20 yoshgacha bo‘lgan yoshlar o‘rtasidagi Osiyo kubogining yarim final o‘yinlari bo‘lib o‘tdi

Ushbu bosqichda O‘zbekiston terma jamoasi Janubiy Koreyaga qarshi maydonga tushdi. Bellashuvning asosiy vaqtida 0:0 hisobi qayd etildi. G‘olib nomi bosh hakam tomonidan belgilangan qo‘shimcha bo‘limlarda ham aniqlanmadi. 

O‘zbekiston va Janubiy Koreya terma jamoalari o‘rtasidagi  o‘yin g‘olibi nomi penaltilar seriyasidan keyin maʼlum bo‘ldi. Quvonarlisi, terma jamoamiz darvozaboni penaltilar seriyasida  raqiblar tomonidan tepilgan to‘pning  uchtasini to‘sa oldi. Yakuniy hisob - 3:1, O‘zbekiston foydasiga.

Shu tariqa Ravshan Haydarov shogirdlari Osiyo kubogining finaliga yo‘l olishdi.

Ikkinchi yarim final bahsida Iroq va Yaponiya terma jamoalari  kuch sinashdi. Ushbu o‘yinda iroqlik futbolchilar matonat ko‘rsatib kunchiqar yurt vakillarini mag‘lub etishni uddaladi.

Endi, 18-mart kuni soat 19:00 da  bo‘lib o‘tadigan final bahsida O‘zbekiston va Iroq terma jamoalari 20 yoshgacha bo‘lgan yoshlar o‘rtasidagi Osiyo kubogi g‘olibi nomiga aniqlik kiritib oladilar. Uchrashuv poytaxtimizdagi “Bunyodkor” stadionida bo‘lib o‘tаdi.

Manba: “Dunyo” axborot agentligi