Qoraqalpog'iston Respublikasi hududlarida qishloq xo'jaligining barqaror tizimini rivojlantirish loyihasi yuzasidan tashkil etilayotgan seminarning ochilish marosimi bo'lib o'tdi.

Tadbirni O'zbekiston Respublikasi Innovatsion rivojlanish vaziri, akademik Ibrohim Abdurahmonov hamda Birlashgan Arab Amirliklari Sho'rlanish sharoitida biodehqonchilik xalqaro markazi (ICBA) bosh direktori, prof.Tarifa All Zaabi xonim ochib berdi. Shuningdek, tadbirda Abu-Dabi taraqqiyot jamg'armasi (BAA) Bosh direktori o'rinbosari janob Xalifa Al Qubaysi, Qoraqalpog'iston Respublikasi qishloq xo'jaligi vaziri, professor Zoxidjon Ziyadullaev, O'zbekiston Respublikasi Investitsiyalar va tashqi savdo vazirining o'rinbosari Badriddin Abidov, O'zbekiston Respublikasi Qishloq xo'jaligi vazirining katta maslahatchisi Alisher Shukurov ishtirok etdi.

Abu Dabi rivojlanish jamg'armasi tomonidan «Qoraqalpog'iston Respublikasining kam rivojlangan hududlarida qishloq xo'jaligi ishlab chiqarish barqaror tizimini rivojlantirish» loyihasiga 5,1 mln. AQSh doll.grant mablag'larini ajratish yuzasidan O'zbekiston Respublikasi Innovatsion rivojlanish vazirligi hamda Qishloq xo'jaligi vazirligi 2022 yilning 20 aprel` kuni o'zaro anglashuv memorandumi imzolangandi.

– So'nggi yillarda Orolbo'yi hududidagi iqlimning o'zgarishi, Orol dengizining qurib qolishi va buning natijasida ulkan sahroning paydo bo'lishi cho'llarni o'zlashtirish bo'yicha Birlashgan Arab Amirliklari tajribasini o'rganishni taqozo etdi. ICBA tashkiloti bilan hamkorlikda Orolbo'yi xalqaro innovatsiyalar markazini tashkil etilishi bu sohadagi ilk qadamlarimiz bo'lgan bo'lsa, Abu-Dabi taraqqiyot jamg'armasi bilan hamkorlikda yirik dasturning imzolanishi mavjud muammolarning ilmiy echimlarini topish uchun yanada katta imkoniyat yaratadi, – dedi Innovatsion rivojlanish vaziri Ibrohim Abdurahmonov.

Loyihaning amalga oshirishdan asosiy maqsad stressga chidamli oziq-ovqat va em-xashak ekinlarini joriy etish, agrobiologik xilma-xillikni qo'llab-quvvatlash va saqlash, qishloq xo'jaligida foydalaniladigan tuproq va suv resurslarini boshqarishni takomillashtirish, rivojlantirish maqsadida O'zbekiston Respublikasida qishloq xo'jaligi sohasida yangi ishlab chiqarish tizimlari va ma'lumotlarga asoslangan yondashuvlarni joriy etishdir. Shuningdek, xalqaro ilmiy markazlar tajribasidan foydalanish, zamonaviy asbob-uskunalar va jihozlar etkazib berish, ilmiy kadrlar tayyorlash orqali qishloq xo'jaligi samaradorligini oshirishga erishishdan hamda sho'rlangan maydonlarda biodehqonchilik mexanizmlarini yaratish va sohaga innovatsion texnologiyalarni keng jalb qilishga alohida e'tibor qaratiladi.

– Ilm-fan va innovatsiyalar nafaqat Orlbo'yi muammolarini, balki global iqlim o'zgarishlari bog'liq ko'plab masalalarni hal etishda muhim o'rin tutadi, – dedi Tarifa All Zaabi xonim. –O'zbekiston Respublikasi Innovatsion rivojlanish vazirligi va Qishloq xo'jaligi vazirligi bilan hamkorligimiz samarasi natijasida loyihamiz o'z ishini boshlarkan, ko'zda tutilgan ishlarni amalga oshirilishda O'zbekiston ilmiy-tadqiqot muassasalari, olimlar jamoasiga tayanamiz. Loyihamiz doirasida erishilgan natijalar hududning barqaror kelajagi uchun zamin yaratishiga ishonaman.

Ta'kidlash joizki, mazkur loyiha Qoraqalpog'iston Respublikasida erlardan yanada samarali foydalanishni rag'batlantirish, shikastlangan tuproq va tashlandiq erlarni qayta ishlash, chorvachilik va qishloq xo'jaligi mahsulotlarini qayta ishlash sanoatini rivojlantirish, noqulay muhitga chidamli oziq-ovqat va em-xashak ekinlarini joriy etish, agrobiologik xilma-xillikni qo'llab-quvvatlash hamda sho'rlangan maydonlarda biodehqonchilik mexanizmlarini yaratish va sohaga innovatsion texnologiyalarni keng jalb qilishga qaratilgan.

Loyihani amalga oshirish natijasida sharoiti og'ir bo'lgan mahalla va qishloqlarda aholining turmush sharoiti, mahalliy hududlarning iqtisodiy-ijtimoiy holati yaxshilanishi kutilmoqda.

Manba: O‘zbekiston Respublikasi Innovatsion rivojlanish agentligi