Turkiyaning Istanbul shahriga amalga oshirgan tashrifi doirasida innovatsion rivojlanish vaziri Ibrohim Abdurahmonov Tojikiston Respublikasi Investitsiyalar va davlat mulki boshqaruvi qo'mitasi raisi S. Qodirzoda bilan uchrashdi.

Uchrashuvda tomonlar ikki tomonlama hamkorlik holati va uni kengaytirish imkoniyatlarini muhokama qildilar. Xususan, Tojikiston delegatsiyasi rahbari Qodirzoda tomonidan ikki mamlakat o'rtasidagi munosabatlarda so'nggi 6 yil davomida jiddiy va ijobiy o'zgarishlar yuz berayotgani ta'kidlandi.

Innovatsion rivojlanish vaziri o'zbek-xitoy olimlari hamkorligida ishlab chiqilgan ZF-UZ-VAC2001 vaktsinasini Tojikiston Respublikasida ro'yxatdan o'tkazish bo'yicha o'z takliflarini berdi. Vaktsina ro'yxatga olingach, o'zbek tomon hamkorlar bilan birgalikda 500 ming doza vaktsina yuborishi ko'zda tutilmoqda.

Suhbat so'ngida Tojikiston va O'zbekiston o'rtasida innovatsion ishbilarmonlik va startap loyihalari doirasida tajriba almashishga kelishib olindi.

Manba: O‘zbekiston Respublikasi Prezidentining rasmiy veb-sayti