Dushanbe shahrida tashqi ishlar vaziri v.b. Vladimir Norov boshchiligidagi O'zbekiston delegatsiyasi Markaziy Osiyo mamlakatlari tashqi siyosat mahkamalari rahbarlarining navbatdagi uchrashuvida ishtirok etdi.

Tadbir ishtirokchilari mintaqaviy hamkorlikning dolzarb mavzulari, jumladan, iqtisodiyot sohasida, savdo va investitsiyalar, transport va tranzit, mintaqaviy xavfsizlikni ta'minlash, zamonaviy tahdidlar va xavf-xatarlarga qarshi birgalikda kurash sohalarida aloqalar samaradorligini oshirish istiqbollarini ko’rib chiqdilar. 

Tomonlar Markaziy Osiyo davlatlari Rahbarlarining navbatdagi, to'rtinchi, Maslahatlashuv uchrashuviga tayyorlarlik ko’rish va uni o'tkazish bilan bog'liq masalalar yuzasidan ham fikr almashdilar.

Kelgusi sammit doirasida imzolanishi rejalashtirilgan XXI asrda Markaziy Osiyoni rivojlantirish maqsadida Do'stlik, yaxshi qo'shnichilik va hamkorlik to'g'risidagi shartnoma mintaqamiz mamlakatlari hamkorligi tarixida yangi davrni boshlab berishi ta’kidlandi.

Tomonlarning yakdil fikricha, mintaqamiz davlatlari o'rtasidagi izchil va o'zaro manfaatli hamkorlik Markaziy Osiyoning barqaror taraqqiyoti va umumiy farovonligini ta'minlash g'oyasiga mutlaq monanddir.

Manba: O’zbekiston Respublikasi Tashqi ishlar vazirligi