Prezident va ixtisoslashtirilgan maktablar va Fransiya o‘rta maxsus taʼlim muassasalari o‘rtasida hamkorlikni yo‘lga qo‘yish masalalarini muhokama qilish maqsadida O‘zbekistonning Fransiyadagi elchisi Sardor Rustamboyev Prezident taʼlim muassasalari agentligi direktori Hilola Umarova bilan uchrashdi

Agentlik rahbari o‘z tashkiloti faoliyati, Prezident maktablarining asosiy o‘quv dasturlari, ixtisoslashtirilgan taʼlim muassasalarida o‘zining milliy kadrlar tayyorlash dasturini ishlab chiqish jarayonida xalqaro standartlarni joriy etish bo‘yicha amalga oshirilgan ishlar haqida maʼlumot berdi.

Jumladan, maktablarda “STEM” (fan, texnika, muhandislik, matematika) fanlarini o‘qitish hamda “agrotexnologiya” fanini maktab jadvaliga kiritish masalasini ishlab chiqish haqida fikr almashildi.

Bundan tashqari, davlatimiz rahbari topshirig‘iga binoan Prezident maktablari o‘quvchilarining salohiyatini kengaytirish maqsadida respublikaning har bir mintaqasining o‘ziga xos xususiyatlarini hisobga olgan holda ularning dasturlariga ikkinchi tilni qo‘shish rejalashtirilayotgani taʼkidlandi.

Uchrashuv davomida fransuz tilini ikkinchi chet tili sifatida o‘qitish va buning uchun fransuz tili o‘qituvchilarini jalb qilish hamda muassasalarni o‘quv darsliklari va adabiyotlar bilan taʼminlash masalalari muhokama qilindi.

O‘zbekistonda inklyuziv taʼlimni rivojlantirish maqsadida iqtidorli bolalarni o‘qitayotgan o‘qituvchilar uchun malaka oshirish kurslarini tashkil etish bo‘yicha “INSHEA” Nogiron yoshlar taʼlimining milliy oliy taʼlim ilmiy-tadqiqot instituti bilan hamkorlikni yo‘lga qo‘yish masalasi ko‘rib chiqildi.

 Uchrashuv yakunlari bo‘yicha «Alliance Francaise» tashkiloti bilan ixtisoslashgan maktablarga fransuz tili kabinetini tashkil etish, o‘qituvchilarning qisqa muddatli malaka oshirish kurslarini tashkil etish, shuningdek, fransuz ommaviy axborot vositalarida  ixtisoslashtirilgan maktablar to‘g‘risida  turkum materiallarni   chop etish bo‘yicha hamkorlikni yo‘lga qo‘yish bo‘yicha kelishuvga erishildi.

Manba: “Dunyo” axborot agentligi