Samarqandlik tadbirkorlar shu kunlarda Turkiya Respublikasida bo‘lib, ushbu mamlakatda o‘tkazilayotgan biznes forum va ko‘rgazmalarda ishtirok etmoqda.

Safarning birinchi kunida tadbirkorlar Istanbuldagi sanoat korxonalari faoliyati bilan tanishdi, hamkorlikda ishlash istiqbollari belgilab olindi.

Samarqand viloyati hokimining birinchi o‘rinbosari J.O‘roqov va Istanbul savdo-sanoat palatasi raisi Sekib Avdagic ishtirokidagi uchrashuvda Samarqand va Istanbul tadbirkorlarining hamkorligini kengaytirish, birgalikda biznes forumlar o‘tkazish yuzasidan fikr almalishdi.

– Keyingi yillarda mamlakatlarimiz o‘rtasidagi savdo aylanmasining o‘sib borayotgani tadbirkorlarimizning faol hamkorlik qilayotganidan dalolat beradi, – dedi J.O‘roqov. – Jumladan, Samarqandda ham turkiyalik ishbilarmonlar bilan birgalikda ko‘plab loyihalar amalga oshirilmoqda. Biz savdo-investitsiyaviy hamkorlikni yanada rivojlantirish uchun barcha imkoniyatni ishga solamiz va buning uchun shart-sharoit yaratishni kafolatlaymiz.

Uchrashuvda ikki tomon uchun ham manfaatli bo‘lgan investitsiya loyihalarini amalga oshirish yuzasidan kelishuvga erishildi. 

Manba: O'zA