O‘zbekiston Respublikasi madaniyat vaziri Ozodbek Nazarbekov mamlakatimiz hayotidagi muhim siyosiy jarayon — Prezident saylovini kuzatish maqsadida yurtimizga tashrif buyurgan Birlashgan Arab Amirliklari Milliy arxivi bosh direktori Abdulla bin Muhammad Al Rais bilan uchrashdi.

Ma’lumki, arxiv har bir davlatning tarixi va bugunini o‘zida mujassam etgan manzildir. Tarixga oid eng noyob manbalarni ayni arxivda saqlanishi ham bu sohaga alohida e’tibor qaratilib, xalqaro hamkorlikni yuksaltirishni taqozo etadi.

Mazkur muzokara chog‘ida ham arxiv bilan ishlash masalalari muhokama etildi. Shuningdek, uchrashuv davomida arxivda mavjud tarixiy ma’lumotlarni almashish, noyob qo‘lyozmalar va meroslarni o‘rganish ustida birgalikda ishlash, o‘zaro nusxalar almashinuvini yo‘lga qo‘yish kabi muhim takliflar bildirildi.

Shu bilan birga, Birlashgan Arab Amirligida yaqinda bo‘lishi kutilayotgan O‘zbekiston madaniyati kunlari hamda o‘zbek mumtoz san’ati durdonasi bo‘lgan Shashmaqomni YUNESKOning "Dunyo xotirasi" nomli dasturiga kiritish yuzasidan fikr-mulohazalar almashinildi.

Manba: O'zA