“Rossiya Federatsiyasi Bosh ilmiy-innovatsiya amaliyot markazi” AJ bosh direktori Oleg Bogatiryov boshchiligidagi Rossiya delegatsiyasi Davlat soliq qo‘mitasiga tashrif buyurdi. Ushbu jamiyat Rossiya Federal Soliq xizmati uchun avtomatlashtirilgan axborot tizimlarini ishlab chiquvchi hisoblanadi.

Bu tashrif ikki mamlakat soliq xizmatlari va shu yilning aprel oyida imzolangan o‘zaro hamkorlik to‘g‘risidagi bitimning keyingi bosqichidir. 

Uchrashuv doirasida DSQ rahbariyati rossiyalik mutaxassislar bilan soliq ma’murchiligi tizimini rivojlantirish dasturining ikkinchi bosqichini amalga oshirish jarayonini muhokama qildi. Xususan, chakana savdoda tovar aylanmasi va elektron hisob-fakturalarni hisobga olish hamda QQSni avtomatlashtirilgan tarzda nazorat qilishda tahliliy vositalardan foydalanish bo‘yicha fikr almashdi. 

Yil oxirigacha ushbu bosqichning birgalikdagi ishlarini yakuniga yetkazish va strategik sheriklikning istiqboldagi rejalari belgilab olingani qayd etildi. 

Delegatsiya a'zolari DSQ Axborot-kommunikatsiya texnologiyalari departamentining dasturiy mahsulotlari, Ma’lumotlarni qayta ishlash markazining yangilangan zamonaviy uskunalari bilan tanishdilar. 

Manba: O‘zbekiston Respublikasi Davlat soliq qo‘mitasi