Umuman olganda, futzal bo‘yicha O‘zbekiston terma jamoasi Jahon chempionatidan boshini tik tutgan holda qaytishga haqli. Garchi, ilk o‘yinda vakillarimiz bizdan sezilarli darajada kuchli bo‘lmagan Gvatemalaga alamli tarzda yutqazib qo‘yishgan bo‘lsa-da, keyinchalik Ahmedov shogirdlari ko‘rsatgan o‘yinlar muxlisu mutaxassislarga manzur bo‘ldi.

Jahonning eng kuchli jamoalaridan biri, so‘nggi jahon chempionati finalchisi Rossiya bilan tengma-teng o‘ynagan hamyurtlarimiz 4-2 hisobida yutqazishgan bo‘lsa, guruh bosqichining so‘nggi turida Misr terma jamoasi ustidan 2-1 hisobida g‘alaba qozonib, mundialning pley-off bosqichiga yo‘l oldi.

Chorak final yo‘lida futzalchilarimiz so‘nggi Jahon chempionatining bronza medali sohibi Eronga 9-8 hisobida alamli tarzda imkoniyatni boy berishdi. Biroq, biz uchun yigitlarimiz mag‘lub emas, balki G‘OLIB. Bugun orttirilgan tajriba esa kelgusi g‘alabalar uchun poydevor bo‘lib xizmat qilsa ne ajab.