2021-yil 21-sentabr kuni O‘zbekiston Respublikasi Axborotlashtirish va telekommunikatsiyalar sohasida nazorat bo‘yicha davlat inspeksiyasi boshlig‘i, Axborot texnlogiyalari va kommunikatsiyalarini rivojlantirish vazirining birinchi o‘rinbosari, Davlat aktivlarini boshqarish agentligi direktorining o‘rinbosari, boshqa mas’ul xodimlar ishtirokida “Raqamli O‘zbekiston - 2030” strategiyasida belgilangan va agentlik ijrosiga bevosita mas’ul bo‘lgan loyihalarning amalga oshirilish holati muhokama qilindi.

Yig‘ilishda O‘zkomnazorat boshlig‘i tomonidan loyihalarni o‘z vaqtida, sifatli amalga oshirish, axborot tizimlarini ishga tushirish, xodimlarning AKT hamda “Elektron hukumat”, raqamli texnologiyalar yo‘nalishidagi bilimlarini mustahkamlash va boshqa muhim masalalar yuzasidan agentlik mutasaddilariga tavsiyalar berildi.

Axborot texnologiyalari va kommunikatsiyalarini rivojlantirish vazirining birinchi o‘rinbosari ham loyihalar ijrosini ta’minlashning ahamiyati, vazirlik tomonidan bu borada o‘rganishlar orqali hamkorlik qilish muhim ekanligini qayd etdi. Yig‘ilish yakunida loyihalarni amalga oshirish bo‘yicha asosiy vazifalar belgilab olindi.

Manba: O‘zbekiston Respublikasi Axborotlashtirish va telekommunikatsiyalar sohasida nazorat bo‘yicha davlat inspeksiyasi