“yosh kitobxon oila” tanlovining viloyat bosqichi g'oliblari aniqlandi

Yoshlar ishlari agentligi, Mahalla va oilani qo'llab-quvvatlash vazirligi hamda O'zbekiston Yozuvchilar uyushmasi hamkorligida tashkil etilgan tanlovning tuman-shahar bosqichlari joriy yilning 19-iyun kuni bo'lib o'tgan edi. Mazkur bosqichlarda 940 yosh oila ishtirok etgan bo'lib, undan yuqori natijalarni egallagan 18 yosh oila viloyat bosqichiga yo'l oldi.

Asosiy maqsad jamiyatimizda kitobxonlikni rivojlantirish, ayniqsa, yoshlar o'rtasida mutolaa madaniyatini shakllantirishdir. 

Tanlovning hududiy bosqichlari 2 ta shart, jumladan, tezkor savol-javob orqali ishtirokchilarga tavsiya etilgan adabiyotlarni qay darajada o'zlashtirgani aniqlandi. Badiiy asarlar bilimdoni shartida tanlangan biletda ko'rsatilgan asarning syujetiga oid epizod o'qib eshittirildi va ishtirokchilar ushbu parcha qaysi asardan olinganini izohlashdi. Hakamlar hay'atining yakuniy xulosalariga ko'ra, Oqqo'rg'on tumanidan qatnashgan Fayzullaevlar oilasi 191,6 ball bilan birinchi o'rinni egalladi. Chirchiq shahridan Nazirxo'jaevlar oilasi 138,3 ball bilan ikkinchi va Tog'aymurodovlar oilasi esa 113,3 ball bilan uchinchi o'rinlarga munosib ko'rildi. G'oliblarga tashkilotchilar tomonidan esdalik sovg'alari topshirildi. 

Tanlovning Respublika bosqichi joriy yilning avgust oyida Toshkent shahrida televizion formatda bo'lib o'tadi. Unda ishtirok etish uchun tanlovning hududiy bosqichlarida g'oliblikni qo'lga kiritgan 14 yosh oila 3 shart bo'yicha o'zaro bellashadi. G'olib bo'lganlar, xususan, 1-o'rin «Spark» avtomashinasi, 2-o'rin kompyuter jamlanmasi va 3-o'rin egalari kitoblar to'plami bilan taqdirlanadi. Respublika bosqichining barcha ishtirokchilariga esa “Yoshlar kutubxonasi” rukni ostida chop etilgan kitoblar jamlanmasi taqdim etiladi. 

Manba: Toshkent shahar hokimligi