O‘zbekiston sog‘liqni saqlash vazirligi maʼlumotiga ko‘ra, Rossiya sog‘liqni saqlash vaziri Mixail Murashko boshchiligidagi delegatsiya mamlakatimizga tashrif buyurdi

Delegatsiya tarkibiga Rossiya sog‘liqni saqlash vazirligi vakillari, shuningdek, akademik V.Shumakov nomidagi transplantologiya va sunʼiy organlar milliy tibbiyot ilmiy-tadqiqot markazi direktori Sergey Gotye va N.Pirogov nomidagi Rossiya milliy ilmiy-tekshirish tibbiyot universiteti rektori Sergey Lukyanov kabi yuqori darajadagi mutaxassislar kiritilgan.

Tashrif davomida yuqori darajadagi qator uchrashuvlar, mamlakatimizning yetakchi tibbiyot muassasalariga tashriflar rejalashtirilgan.

Shuningdek, delegatsiya N.Pirogov nomidagi Rossiya milliy ilmiy-tekshirish tibbiyot universiteti filialining ochilishiga tayyorgarlik ko‘rish ishlarini ko‘zdan kechirish maqsadida Chilonzor tibbiyot kollejiga ham tashrif buyuradi.

Tashrif yakunlari bo‘yicha O‘zbekiston sog‘liqni saqlash vazirligi va N.Pirogov nomidagi Rossiya milliy ilmiy-tekshirish tibbiyot universiteti o‘rtasida shartnoma imzolanishi ko‘zda tutilmoqda.

Manba: “Dunyo” axborot agentligi