O‘zbekiston Prezidentining huquqni muhofaza qiluvchi va nazorat organlari faoliyatini muvofiqlashtirish masalalari bo‘yicha maslahatchisining o‘rinbosari Doniyor Qodirov boshchiligidagi mamlakatimiz huquq-tartibot idoralari delegatsiyasi kecha Seulda Janubiy Koreya Bosh prokurori vazifasini bajaruvchi Che Nam Gvan bilan uchrashdi

O‘zbekistonning Seuldagi elchixonasi ma’lumotiga ko‘ra, uchrashuvda Koreya Respublikasi prokuraturasi bilan hamkorlikni rivojlantirishning bugungi holati va istiqbollari muhokama qilindi. Tomonlarni qiziqtirgan keng ko‘lamli sohalarda hamkorlikni yanada jadallashtirish bo‘yicha amaliy qadamlar belgilandi.

O‘zbekiston va Janubiy Koreya bosh prokuraturalari o‘rtasida korrupsiya jinoyatlarini tergov qilish bo‘yicha memorandum loyihasi ustida ish boshlash haqida kelishuvga erishildi.

Janubiy Koreya tomoni O‘zbekiston prokuraturasi xodimlari uchun prokuraturalarda stajirovka tashkil etish, shuningdek, huquq-tartibot xodimlari uchun treninglar va mashg‘ulotlar o‘tkazish uchun mamlakatimizga mutaxassislar yuborishga tayyorligini bildirdi.

Manba: “Dunyo” axborot agentligi