Delegatsiya a'zolari bir qator sanoat va madaniyat maskanlarida bo‘ldi. Jumladan, biznes-inkubatorga tashrif davomida aholini hunarmandchilik va tadbirkorlikka jalb etish bo‘yicha Saudiya Arabistoni tajribasi o‘rganildi. Shuningdek, Payg‘ambarimizning hayoti va Islom sivilizasiyasi xalqaro muzeyi ziyorat qilindi va u yerda Saudiya Arabistoni tomoni madaniy va tarixiy merosni targ‘ib qilishda innovasiyalar va axborot-kommunikasiya texnologiyalarini qo‘llash bo‘yicha erishilgan yutuqlarni taqdim etdi.

 

Shuningdek, tashrif chog‘ida Madina mintaqasi amiri shahzoda Faysal bin Salmon al-Saud bilan uchrashuv bo‘lib o‘tdi. Unda investisiyaviy, savdo-iqtisodiy, ilmiy-texnikaviy, madaniy-gumanitar sohalardagi hamkorlikni rivojlantirish istiqbollari o‘rganildi. Xususan, Samarqand va Madina shaharlari o‘rtasida savdo-iqtisodiy va madaniy aloqalarni yo‘lga qo‘yish chora-tadbirlari muhokama qilindi. Podshoh Faysal nomidagi Islomshunoslik markazi bilan Toshkent shahridagi Islom sivilizasiyasi markazi o‘rtasida hamkorlikni yo‘lga qo‘yishning salohiyati ham qayd etildi.

 

Uchrashuv yakunida ikkala tomon ham manfaatdor bo‘lgan loyiha va tashabbuslarni ilgari surish maqsadida hamkorlikni faollashtirish bo‘yicha kelishuvga erishildi.