O‘zbekiston davlat soliq qo‘mitasi raisi (DSQ) Sherzod Kudbiyev Turkiyaning mamlakatimizdagi yangi tayinlangan elchisi Olgan Bekarni qabul qildi, deb xabar bermoqda “Dunyo” AA muxbiri.

DSQ matbuot xizmati maʼlumotiga ko‘ra, Sherzod Kudbiyev uchrashuv avvalida elchini masʼuliyatli lavozimga tayinlangani bilan tabrikladi va kelgusi faoliyatida muvaffaqiyatlar tiladi. Ikki davlat rahbarlari tomonidan belgilangan vazifalar ijrosini taʼminlash davlat idoralari rahbarlari zimmasiga yuklatilganini taʼkidladi. Bunda eng asosiysi, O‘zbekiston va Turkiya o‘rtasidagi ko‘p qirrali va o‘zaro manfaatli hamkorlikni yana-da mustahkamlash ekanligi qayd etildi.

Uchrashuv davomida DSQ raisi O‘zbekiston soliq maʼmuriyatchiligini takomillashtirish uchun Turkiya, Janubiy Koreya, Rossiya va boshqa mamlakatlarning ilg‘or tajribasini o‘rganish muhimligini taʼkidladi.

Shuningdek, elchi Turkiya O‘zbekiston DSQ xodimlarining malakasini oshirish, tajriba almashish borasida har tomonlama ko‘maklashishga va hamkorlikning yangi qirralarini qayta ko‘rib chiqishga tayyorligini bildirdi.

O‘zbekiston-Turkiya kun tartibidagi dolzarb mavzular, soliq sohasidagi yaqin aloqalarni rivojlantirish, xususan, ikki tomonlama soliqqa tortishning oldini olish uchun soliq xizmatlari o‘rtasida o‘zaro maʼlumot almashinuvini yo‘lga qo‘yish kabi masalalar muhokama qilindi.

Manba: “Dunyo” axborot agentligi