Xabaringiz bor, joriy yilgi futbol mavsumidan boshlab ichki chempionatimizda VAR (Video Assistant Referee) tizimidan foydalaniladi. Shu maqsadda O‘zbekiston superliga bahslarida ishlaydigan arbitrlar va ularga nomzod bo‘lgan yosh hakamlar uchun yanvar-fevral oylarida o‘quv-mashg‘ulot yig‘inlari tashkil etildi.

Shuningdek, Futbol mutaxassislarini tayyorlash markazida (Video Assistant Referee) video yordamchi hakamlar tayyorlash bo‘yicha mavsum oldi so‘nggi nazariy-amaliy seminar ham o‘tkazildi.

VAR hakamlari maydondagi mashg‘ulotlarda FIFA VAR simulyatoridan foydalangan dolzarb mavzularda, xususan jarima maydonchasidagi qoida buzishlar, ofsayd, taktik qoida buzarliklar bo‘yicha o‘z malakalarini oshirdi.

Seminar yakunida taniqli FIFA referisi Valentin Kovalenko hakamlik faoliyatini yakunlaganligi munosabati bilan O‘FA maxsus sovrini bilan taqdirlandi. O‘FA birinchi vitse-prezidenti Ravshan Ermatov hamda futbol hakamlari ushbu mutaxassis shaʼniga iliq so‘zlarni aytib, intruktorlik faoliyatida muvaffaqiyat va zafarlar tiladi.

Manba: O‘zbekiston Respublikasi Yoshlar siyosati va sport vazirligi