Murojaatnomada yurtimizda yakunlanayotgan yilda amalga oshirilgan ishlar sarhisob qilinib, 2021-yilda va yaqin istiqbolda mamlakatimizni ijtimoiy-iqtisodiy rivojlantirishning eng ustuvor yo‘nalishlari belgilab berildi. 2021-yil O‘zbekistonda “Yoshlarni qo‘llab-quvvatlash va aholi salomatligini mustahkamlash yili”, deb ataldi.

 

Davlatimiz rahbarining Murojaatnomasida 2021-yilda mamlakatimiz va xalqimiz hayotidagi muhim siyosiy voqea — prezident saylovi o‘tkazilishi va Markaziy saylov komissiyasi bo‘lajak saylovlarni milliy qonunchilik va umum'etirof etilgan xalqaro demokratik tamoyillar asosida yuqori darajada tashkil etishga alohida e'tibor qaratishi lozimligi qayd etildi. Shu bilan birga, o‘tgan saylovlarda orttirilgan milliy tajriba hamda xalqaro kuzatuvchilar tomonidan berilgan maqbul tavsiyalarni milliy saylov qonunchiligi va amaliyotiga tatbiq etish ishlarini davom ettirish zarurligiga e'tibor qaratildi.

 

Tadbirda Mirzo Ulug‘bek Abdusalomov bo‘lajak saylovlarni har tomonlama puxta va qonun talablari asosida o‘tkazish, ushbu mas'uliyatli vazifaga demokratik talablarga mos tarzda, ochiq, oshkora va yorug‘ yuz bilan tayyorlanishida barchaga yuksak muvaffaqiyat, mustahkam salomatlik va xotirjamlik tiladi.  

 

“Vatanimiz ravnaqi, xalqimiz farovonligi yo‘lidagi xayrli ishlaringizda ulkan zafarlar, oilaviy baxt va omadlar yor bo‘lsin, - dedi Markaziy saylov komissiyasi Raisi.