O‘zbekiston Prezidentining «Kurash milliy sport turini rivojlantirish va uning xalqaro nufuzini yanada oshirish chora-tadbirlari to‘g‘risida»gi qarorida belgilangan vazifalar ijrosini ta’minlash maqsadida joriy yil 26-27 dekabr kunlari davlat organlari, muassasalari va tashkilotlari xodimlari o‘rtasida «O‘zbek polvoni» musobaqasi o‘tkaziladi, deb xabar bermoqda «Dunyo» AA muxbiri.

O‘zbekiston jismoniy tarbiya va sport vazirligi, O‘zbekiston kurash federatsiyasi va qator tashkilotlar hamkorligida Toshkent moliya instituti sport majmuasida bo‘lib o‘tadigan musobaqani tashkil etishdan ko‘zlangan maqsad davlat organlari, muassasalari va tashkilotlari xodimlarining jismoniy rivojlanishini takomillashtirish, ommaviy sportga, milliy sport turi - kurashga bo‘lgan qiziqishini oshirish, ular o‘rtasida sog‘lom turmush tarzini shakllantirish, kurashni umumxalq sporti sifatida keng targ‘ib etishdan iborat.

Musobaqada respublika davlat organlari, muassasalari va tashkilotlari xodimlaridan tashkil topgan erkaklar va ayollar jamoalari bahs olib boradi. Xususan, erkaklar jamoalari 4 ta – 66 kg, 81 kg, 90 kg, +90 kg vazn toifalarida va ayollar 3 ta – 57 kg, 63 kg, + 63 kg vazn toifalarida bellashadi.

Manba: “Dunyo” axborot agentligi