Innovatsion rivojlanish vazirligi tashabbusi bilan, 12-noyabr kuni Wiley (John Wiley & Sons) kompaniyasi vakillari ishtirokida Cochrane kutubxonasiga bagʻishlangan vebinar oʻtkazildi. Vebinarda tibbiy oliy taʼlim muassasalari va ilmiy tadqiqot institutlari yosh olimlari va tadqiqotchilari ishtirok etdilar.

Wiley (John Wiley & Sons) kompaniyasining mintaqaviy vakili Sergey Paramonov sogʻliqni saqlash sohasida dalillarga asoslangan ilmiy ishlar ahamiyati haqida gapirdi.

– Cochrane kutubxonasi sogʻliqni saqlash tizimi uchun dunyoda yagona boʻlgan maʼlumotlar bazasidir, – dedi S. Paramonov. – Ushbu platforma klinik maʼlumotlarni topish va qisqa vaqtda soʻnggi tadqiqotlar natijalari asosida qarorlar qabul qilishga yordam beradi.

Taʼkidlash joizki, “Wiley” kompaniyasi hamda Innovatsion rivojlanish vazirligi oʻrtasida erishilgan kelishuv doirasida 2020-yilning 15-sentyabridan mamlakatimizdagi Oliy taʼlim muassasalari va ilmiy-tadqiqot institutlariga “Wiley Online Library” elektron resurslaridan bepul foydalanish imkoniyati yaratildi. Ilmiy-texnik axborot markazi mazkur loyihaga texnik koʻmak koʻrsatadi va vebinarlarni tashkil etashga yordamlashadi.